Parlamentario Desiree de Sousa Croes (AVP): Habitantenan di Pos Chikito sumamente contento cu Green Corridor

Despues di basta luna di carga pasenshi, por fin Green Corridor den bario di Pos Chikito ta kedando cla. Y e resultado ta mas bunita cu a spera. Klinkersnan a keda masha nechi tur caminda, resalta asina e buntesa di nos bario, Parlamentario de Sousa Croes a expresa.

 

For ora drenta Pos Chikito, di pariba, esta di Savaneta, por mira e cambio postivo cu Green Corridor ta trece cu ne. Ambos banda di caminda, pazuid y panord, a haya su stupinan di klinker y un caminda bunita asfalta. E casnan pega cu caminda cu añanan tabata guli stof, awor ta mira nan cas subi di balor tambe, e Parlamentario a continua bisando.

 

Ademas, DOW a probecha y cuminsa asfalta mas caminda den bario di Pos Chikito y Sabana Basora. Tur caminda di santo lo bira caminda di asfalt p’asina caba tambe cu stof constante tur caminda. E caminda di rotonde bay nord den Sabana Basora pa Rooi Frances, tambe lo haya pronto asfalt nobo, segun promesa di Minister Benny Sevinger na mi persona durante tratamento di Presupuesto 2017.

 

Pues mas tarda luna di april Pos Chikito y Sabana Basora por ta feliz ora e Green Corridor keda cla completamente y tur caminda haya asfalt, Parlamentario de Sousa Croes a duna di conoce.

 

Top