Parlamentario Donny Rasmijn (AVP): Declarando Spaans Lagoen como un area protehi ta un stap grandi den direccion di sostenibilidad di nos naturalesa!

Dia 13 di september 2012, Parlamento di Aruba a ricibi un carta di Aruba Birthlife Conservation cu e peticion pa Gobierno proteha 16 area di nos naturalesa y declaranan como area protehi.

Den e 16 areanan tin Spaans Lagoen cu ta un area protehi segun tratado pa RAMSAR Convencion.

E tratado aki a bin na vigor pasobra plasnan manera Spaans Lagoen tin diferente funcion manera abastece awa y ta un lugar special pa nos flora y fauna, especialmente pa e parhanan cu ta biba eynan. Desde december 1975 e tratado ta na vigor pero Aruba no por a ractifik’e como cu e area mester a wordo midi p’asina por marca e teritorio, Donny Rasmijn ta splica.
Fraccion di AVP a presenta un mocion den Parlamento dia 6 di februari 2013 unda cu ta urgi Gobierno pa declara Spaans Lagoen como un area protehi y pa laga Parke Nacional Arikok, por medio di un landsbesluit, encarga cu e maneho. E mocion aki a wordo aproba unanimamente! Dia 9 di maart 2017 e landsbesluit a keda cla y a wordo publica p’asina cumpli cu e tratado internacional, cumpli cu un parti di e deseo di Aruba Birthlife Conservation y Parlamento di Aruba.

 

“Como miembro di Parlamento cu a presenta e mocion mi por bisa cu ela tarda hopi, door cu mester a midi e tereno, pero si mi ta hopi contento y orguyoso di por a cumpli cu e proteccion di e flora y fauna di nos dushi pais Aruba”, Rasmijn ta expresa.

E otro 15 areanan tambe ta den preparacion pa wordo declara como area protehi en espera di e midimento di e terenonan.
Tambe nos por a wak cu parti di e mangrovenan den Spaans Lagoen a wordo sacrifica p’asina por a construi e brug nobo pa Green Coredor.

E tempo ey Fraccion di AVP atrobe a actua y a pidi Gobierno pa compensa e mangelnan cu a wordo sacrifica dor di planta, cu por lo menos, e mesun cantidad di mangel cu a wordo sacrifica den un otra area pa asina demostra e sentido di responsabilidad pa sostene nos dushi pais.

Cu e deseo aki tambe Gobierno a cumpli e siman cu a pasa aki unda nos por a wak con e contratista ta bezig ta prepara areanan grandi pa plantacion di mangrove pa asina recompensa locual cu a wordo sacrifica pa e brug nobo.
Parlamentario Rasmijn tin su enfoke riba sostenibilidad di Famia, Hubentud, Medio Ambiente y Naturalesa. “Declarando Spaans Lagoen como un area protehi ta un stap grandi den direccion di sostenibilidad di nos naturalesa!”, Donny ta termina.

Top