Parlamentario Donny Rasmijn (AVP): Dunado atencion debido na famianan y nos hobennan ta e solucion pa preveni criminalidad!

“Pa añanan largo nos ta tende reclamo di pueblo y seguramente di politiconan cu criminalidad ta sigui subi. Esaki ta algo berdad, aunke cu el a baha den cierto areanan manera robo di auto, pero nos mester puntra nos mes di unda criminalidad riba nos pais ta bin? Ken ta e personanan cu ta cay den criminalidad? Con nan situacion social y especialmente familiar ta? Ki educacion e criminalnan tin? Tin trabou pa nan? Nan ta interesa pa traha?

En fin, nos mester busca di sa di unda e problema ta origina pa nos por preveni criminalidad. Actualmente Gobierno ta invertiendo hopi mas placa cu antes den combatimento di criminalidad. Aunke tur aña mas Polis ta gradua y mas di 80% di casonan ta wordo soluciona, toch crimen ta sigui subi”, asina Parlamentario Donny Rasmijn a declara.
“Laga nos ban wak e situacion di nos famianan na Aruba basa rib’e poco informacion cu nos tin. Na aña 2013 e percentage di divorcio na Aruba tabata 91%. Kiermen di cada 100 pareha cu a casa na 2031, tabatin 91 pareha cu a divorcia. Hopi sigur esaki ta un di e cifranan mas halto na mundo. Nos sa cu ta derecho di cada un riba e pais aki pa cuminsa un relacion cu ken cu e kier, pero nos mester haci intentonan grandi pa bin cu programa na scol, na trabou, television, na radio of cualkier otro medio di comunicacion, pa educa nos mes con pa lanta famianan y muchanan den un ambiente sano”, Parlamentario Rasmijn ta splica.

 

“Nos sistema social ta un di e mihonan den area, pero ayudo financiero no ta tur cos. Nos mester puntra nos mes, sigur como Gobernante, con nos ta bay drenta nos scolnan, casnan y comunidad y trece educacion familiar pa un y tur. Pa nos por haci esaki nos mester ta ehempel tambe aunke cu hopi di nos mes a yega di contribui na haci nos famia y yuinan dolor”, e Parlamentario a mustra.
“Recientemente, Cuerpo Policial di Aruba a duna un presentacion den Parlamento unda cu cifranan di nacionalidad di personanan cu ta comete criminalidad a wordo refleha.

A sali na cla cu mayoria di e malhechornan ta di Aruba mes mientras cu tur hende ta culpa extranheronan. Sigur cu tin extranhero envolvi, pero sin e ayudo di nos localnan nan lo no por haci e trabou cu nan ta haciendo. Pues si nos kier preveni pa criminalidad den nos pais sigui crece, nos mester cuminsa focus riba nos famianan y nos hobennan”, Parlamentario Rasmijn ta termina bisando.

Top