Parlamentario Glenbert Croes (MEP): MEP lo combati criminalidad cu man duro

Despues di reunion publico cu MEP a pidi cu caracter di urgencia unda ni Gobierno di AVP y Minister Dowers no kier a ni reconoce cu nos tin un problema grave cu criminalidad for di control na Aruba.
Sr. Glenbert Croes ta elabora mas riba esaki y riba e plan di Partido MEP den e proximo gobernacion di MEP.

“Nos como MEP tabata desea tende cu Gobierno ta reconoce cu tin un problema grave, pero al contrario, fraccion di AVP, Gobierno di AVP y Minister Dowers kiermen cu criminalidad a baha, segun nan”, Croes ta splica.

“Ta pone nos di MEP conclui cu e Gobierno di AVP cu ta esun cu a permiti criminalidad sali for di man den e ultimo 8 añanan aki, AVP no tin e capacidad ni e boluntad pa combati criminalidad p’asina haci Aruba sigur atrobe.
MEP lo combati criminalidad cu man duro y nos lo trece siguridad bek den tur bario aki na Aruba #sinmiedo”, Croes a declara.

MEP lo reintroduci den e Gobierno nobo di MEP despues di e eleccion di september 22 proximo:
1.       MEP lo bin bek cu e helicopter di Polis;
2.       MEP lo bin bek cu radarnan marino;
3.       MEP lo bin bek cu e Team Visibel;
4.       MEP lo bin cu 160 Polis extra cu Cuerpo Policial mester;
5.       MEP lo bin cu un maneho nobo y humano pero stricto di LTU;
6.       MEP lo duna Polis autoridad bek;
7.       MEP lo intensifica e cooperacion cu Marina Real rib’e tereno di Guardacosta;
8.       MEP lo inverti den prevencion p’asina nos preveni criminalidad y no solamente
combati criminalidad;
9.       MEP lo percura pa nos hobennan haya un segundo oportunidad berdadero p’asina nan
por haya trabao y cuminsa un bida nobo.

“E momento a yega pa nos salba nos pais y salba e futuro di tur e yiunan di nos pueblo pa nan por lanta den un Aruba sigur hunto cu nan famia.
Turistanan lo ta sigur atrobe pa nan por disfruta di Aruba den tur paz y trankilidad.
E Gobierno nobo di MEP ta unico salbacion pa logra esaki. Nos digno pueblo tin e salbacion den nos tur nos man 22 di september proximo. Ban hunto p’e cambio. #sinmiedo”, Glenbert Croes a conclui.

Top