Parlamentario Guillfred Besaril (MEP): Aruba den e garanan di criminalidad!

Dialuna mainta durante conferencia di prensa semanal di Partido MEP, Parlamentario señor Guillfred Besaril a elabora rib’e situacion di criminalidad riba nos isla. Parlamentario Besaril a declara lo siguiente.

 

“Tin un grito general cu henter e comunidad di Aruba ta comparti na e momentonan aki: Ta BASTA! Ta basta di tanto criminalidad. Ta basta di tanto insiguridad.

Aruba ta den e ganaran di anti-socialnan cu sin pordron of berguensa algun ta tira atraco riba nos grandinan. Sin ningun clase di consideracion ta cana drenta ciudadanonan humilde nan hogar, menasa nan cu arma di candela y bay cu e poco pertenencianan cu nan por tin”, Parlamentario Besaril ta splica.

 

“Atrobe nos ta cera un aña cu un sin fin na incidentenan den cual uzo di arma di candela ta presente. Di menasa te na maltrato y e fenomeno atraco no por keda afo!

Dia 13 di october 2016 un grupo grandi di ciudadano a lanta para y a manda un mensahe fuerte na Gobierno di AVP di kier mira accion concreto contra e ola di criminiladidad cu a bin ta azota nos pida baranca e ultimo añanan. E cifranan ta papia pa nan mes.

Mas di 60 atraco den un solo aña; pues mas di 1 atraco pa siman!”, e Parlamentario a mustra.

 

“Ta masha poco energia Partido MEP mester gasta pa convence pueblo di Aruba den 2017 di e incapacidad di e gobernantenan actual den e materia di Husticia y Prevencion.

No ta e cantidad ridiculo di asfalt cu klinkers cu wordo basha e ultimo añanan ta duna pueblo e paz y trankilidad cu nan kier y merece, sino accionnan contreto cu nunca tabata un prioridad pa Gabinete Mike Eman I, mucho menos Gabinete Mike Eman II”, Parlamentario Besaril a expresa.

 

“Partido MEP y mi persona tin un Master Plan pa Husticia cu tin dos punto importante como punto di salida:

Un control mas severo di Aruba su costanan pa impedi cu mas arma di candela y cualkier otro producto of actividad ilicito por drenta of sali di nos pais;

Fortifica e liñanan primario den e cadena hudicial p’asina por sali y duna e proteccion necesario cu tanto comunidad ta bogando p’e”, segun e Parlamentario.

 

“Combati criminalidad cu man duro, duna e sosten necesario na esnan cu ta sirbi nos comunidad den e cadena hudicial y pone Husticia como prioridad real, lo ta punto number uno rib’e agenda di e gobierno, una bez cu Partido MEP y mi persona drenta gobernacion. Trece siguridad y trankilidad na un pueblo cu ta sclama pa esaki na grito, definitivamente ta un compromiso serio cu nos lo no ria p’e!”, Parlamentario Besaril a termina bisando.

Top