Parlamentario Guillfred Besaril (MEP): “Enbes di tira cu lodo sr. Arthur Dowers debe pueblo splicacion!”

Parlamentario sr. Guillfred Besaril a habri siman lansando preguntanan critico den direccion di Minister di Husticia, mr. drs. Arthur Dowers, kende siman pasa a permiti e preso peligroso Span-Ospino pasa un “Valentine’s Day” cu su famia.

Sr. Besaril a inicia e conferencia di prensa bisando cu e mandatario ta mandando un mensahe completamente robes pa comunidad di Aruba.

Na lugar di asumi su responsabilidad y sali padilanti dunando pueblo un splicacion di e motibo dicon el a tuma e decision aki, e ciudadano Minister a haña ta bon pa bay over na loke e sa haci mihor, esta tira cu lodo!

 

A bira ora p’e mandatario di husticia duna pueblo cara p’asina e ciudadanonan di Aruba por cuminsa na compronde ta pakico e ta tuma e tipo di decisionnan aki.

Parlamentario Besaril ta continua bisando cu: “Si e Minister tabata un persona cu tabata tuma conseho manera e ta sugeri nos di MEP na haci, awe no lo tabatin un divorcio den partido AVP pa motibo cu su persona y un ex-colega Minister no por a comunica na drechi cu otro!

E ciudadano Minister a demostra un biaha mas di ta un persona cu no ta scucha conseho ni di e profesionalnan cu ta purba di gui’e,  mucho menos di su mesun colega(nan) den Ministerraad. Mas bien e Minister ta campeon den tira cu lodo riba tur cu tribi na trece e berdad padilanti, según Guillfred Besaril.

 

Na mas di un ocasion e mandatario a tira culpa di e inseguridad riba nos isla riba otro. Sino ta riba e sistema di educacion, ta riba e mayornan. Sino t’e mayornan ta riba e situacion social. Sino t’esaki, e ta tire riba oposicion.

Tur hende ta fout menos su maneho. Nunca e mandatario a tribi di wak su mes den spiel y mira kico e mes por a haci n’e situacion.

Ta p’esey Aruba a sera un 2016 cu mas di 60 atraco y un sin fin di incidente cu arma di candela!

 

Si e parti di duna “verlof” n’e detenido Span-Ospino ta parti di su maneho, anto e mandatario mester bin dilanti y splica con su maneho ta hinca den otro. Te cu e dia di awe nunca Minister di Husticia a duna Parlamento ni pueblo un splicacion tocante su maneho.

Na momento cu pueblo wordo confronta cu situacionnan incomprendibel manera esun di e “verlof” di un preso peligroso manera Span-Ospino, ta mas cu logico cu e pregunta cardinal cu ta lanta den comunidad ta “Pakico!”.

 

Span-Ospina ta un individuo cu a comete atraco riba hende, riba banco y a hasta wordo sentencia pa trafica den arma di candela. E tabata un criminal cu e prome oportunidad cu el a haña, a bira huy for di Warda di Polis y a costa pueblo di Aruba basta placa pa por a garantisa su seguridad y esun di comunidad general na momento di a mand’e Hulanda.

Ta mas cu logico cu e Minister tin un obligacion na splica e dicon di su decision den un caso asina.

 

Definitivamente a yega ora p’e Minister di Husticia tene honor na su mes y por lo menos cuminsa na reconoce cu su maneho no a duna resultado cu pueblo tabata kier a mira. Sigui tira cu lodo no ta un opcion mas!

Pueblo di berdad a fada di e situacion alarmante di criminalidad y na grito ta bisa: “TA BASTA!” Parlamentario Besaril a termina su comentario.

 

Top