Parlamentario Jeffrey Kelly: Gritonan populista no ta garantisa un gobernacion responsabel

Durante temporada di campaña varios politico y partidonan politico cu ta aspira pa drenta Parlamento ta haci gritonan populista y profila nan mes como alternativa pa goberna nos pais. Esaki ta haci nos corda rib’e dicho cu ta bisa “e miho hungadornan di bala ta sinta riba tribuna”

Ora un partido politico ta den Gobierno semper por referi na loke a cumpli cu ne durante su periodo di gobernacion, segun Parlamentario Kelly.

 

Den e caso aki pueblo tin un miho perspectiva di con pa midi e trabou cu e Gobierno actual a bin ta haci durante e ultimo 8 añanan. Pueblo por mira claramente con e Gobierno di AVP a traha na bienestar di pais y por mira unda e placa di pueblo a bay.

Contrario na tur e gritonan di oposicion tocante debenan cu e Gobierno di AVP por a haci (invirtiendo den nos pais) nos por constata cu p. e. tempo di MEP e placa tabata bay pa un grupo elite di famia y amigonan. Awe MEP tin un grupo di heredero cu ta encabesa e partido.

E caranan a cambia, pero e filosofia nepotista ta den nan sanger, e Parlamentario ta expresa.

 

Kico ta haci Partido di Pueblo Arubano AVP diferente?

Durante e ultimo ocho añanan pueblo por a mira un lider cu ta traha incansablemente pa su pueblo. Canando cu humildad den barionan Prome Minister ta skucha e necesidadnan di nos pueblo. Combinando e necesidadnan aki cu e resultado di 1000 voz lo ofrece e programa di partido cu AVP lo bay eleccion cu ne.

 

Partido di Pueblo Arubano AVP ta garantisa e continuacion di e trabou cu partido a bin ta desplega despues di a haya e confiansa presta di su pueblo.

Parlamentario Kelly ta di opinion cu un partido cu humildemente a traha cu alma y curpa pa su pueblo cu un vision di renobacion infrastructural, salbaguardiando e fondonan di pensioen, percurando pa mehoracion di compra di nos ciudadanonan y cu enfoke riba energia alternativo, merece e confiansa di pueblo pa continua cu e trabounan cu el a bin ta haciendo, e Parlamentario ta conta.

 

Gritonan populista ta comun den un aña di eleccion, pero pueblo ta mira mas leu cu esey

Opositornan politico ta haciendo promesanan, un papiando mas bunita cu otro.

Nan promesanan ta basa riba populismo y nan ta purba di gana simpatia y confiansa a base di “lagabo scucha loke bo kier skucha”, sin tene cuenta cu si esaki lo ta responsabel y posibel ora bo ta goberna un pais.

 

Algun di nan ta miembro di Parlamento y sa cu obviamente tin promesanan cu no ta realistico. Otronan tin bon ideanan, ta papia bunita y ta entretene pueblo, pero no tin ningun experiencia y no ta prepara pa por eherece un reponsablidad ehecutivo. Nan ta e miho hungadornan di bala.  Pero pueblo ta consciente di esaki y lo sa di vocifera su mes na september, Parlamentario Kelly ta conclui.

Leave a Reply

Top