Parlamentario Jeffrey Kelly: MEP no tin argumento valido ora ta trata enseñansa

Ultimamente Partido MEP ta papia tocante kico si of kico no a wordo haci pa enseñansa durante gobernacion di partido AVP. MEP ta scoge pa keda tapa wowo pa desaroyonan positivo den enseñansa, pero cu sumo placer nos lo keda recorda MEP tocante e inversionnan cu a wordo haci durante e ultimo 8 añanan, segun Jeffrey Kelly di AVP.

 

Pa cuminsa nan mes ta admiti cu durante e ultimo añanan a inverti den reconstruccion di scolnan, pasobra un Parlamentario di MEP ta bisa cu no mester focus solamente den reconstrui scol, pero tambe mester construi scol.

E prome afirmacion ta corecto, pasobra Gobierno di AVP durante e ultimo 8 añanan a reconstrui un cantidad di edificio di scol, pero e di dos afirmacion ta eroneo y mester wordo coregi.

 

Segun Kelly tanto e Parlamentario aki y tambe su lider mester corda cu si MEP durante nan gobernacion a atende cu infrastructura di scolnan manera cu mester tabata, e Gobierno actual lo no mester a inverti miyones den reconstruccion di scolnan rond di Aruba. Pasobra nos tur por corda e situacion di scolnan den ruina, caminda cu fan a hera cay riba maestro y caminda cu muchanan mester a para bandi otro p’asina tapa e bista pa otro por haci uzo di baño, ya cu e bañonan na scol no tabatin ni porta.

Y awe ta tapa wowo p’e hecho cu a ruim op e desaster cu nan a laga atras.

 

LIDER DI MEP ATROBE TA PAPIA MENTIRA

Lider di MEP ta bisa cu e Gobierno actual no a construi ningun scol. P’esey mester corda e lider di MEP cu si e ta haci su huiswerk e lo ta na altura cu ta construyendo un scol nobo patras di EPI.

Te hasta a sali un articulo cu ta papia di un bishita cu miembronan di fraccion di AVP a haci n’e edificio nobo di Prinses Amalia Basisschool cu e Gobierno aki a construi.

Pero pa loke ta enseñansa ta parce cu e fraccion di MEP ta na soño.

 

Si lider di MEP ta pone un tiki mas atencion e lo a tuma nota di un anuncio cu DOW a publica den corant algun siman  atras caminda cu ta yama un destaho publico pa construccion di un edificio nobo di SPO na Savaneta.

 

TUR LOKE MEP KIER DRECHA TA WORDO HACI CABA

MEP ta bisa tambe cu lo mester duna atencion na muchanan cu tin problema di comportacion. Si e fraccion di MEP ta pone atencion durante tratamento di presupuesto, nan lo a tuma nota cu Multi Disciplinaire Centrum tin un programa cu ta atende cu muchanan cu tin problema di comportacion y tambe un programa pa atende cu muchanan cu tin problema pa siña.

Pero ta parse cu MEP no ta haci nan huiswerk, no tin argumentonan valido y ta carece di ideanan constructivo ora ta  trata enseñansa, Jeffrey Kelly a sigui señala.

 

MEP TA POPULISTA Y NO TA SPLICA PUEBLO CON NAN LO TRECE CAMBIO

Kelly ta remarca cu ta obvio cu MEP semper ta bin dilanti cu loke segun nan ta un problema of algo cu lo mester drecha, pero nunca no ta splica CON nan tin pensa di haci esaki.

Si bo ta un partido cu ta profila bo mes como e alternativa (manera cu nan ta yama nan mes) pa goberna e pais aki bo mester por splica pueblo y sigur den un aña di eleccion ta CON bo kier trece un cambio.

 

MEP semper ta haci uzo di palabranan manera “mester haci un studio”,  “ lo duna su debido atencion”, “lo mester busca un solucion”, pero no ta splica CON!                                                         Y esey nos por mira cada biaha den oposicion, nan ta tira algo den laira hunga populista, pero sin wak e logica den loke nan ta trece dilanti, segun Jeffrey Kelly.

Top