Parlamentario Jennifer Arends-Reyes: Aruba ta score bon pa varios punto di atencion na beneficio di nos hende muher

Parlamentario di AVP, sra Arends-Reyes a bisa cu na aña 2006 World Economic Forum a introduci e indice di distincion global entre e generonan. Central Bureau of Statistics di Aruba CBS tambe a enfoca riba e topico internacional aki durante nan Censo na October 2010.

E indice aki ta enfoca riba 4 categoria fundamental: Participacion Economico, Oportunidad, Educacion, Salud y Sobrevivencia y Fortificacion di participacion politico.

 

Nos isla a score relativamente bon compara cu Merca, Hulanda y algun area di Caribe. Algun punto cu ta remarcabel ta cu nos indice di participacion di nos generonan den e area laboral ta casi igual.

Na aña 2012,  23,162 (64,6%) hende muher ta participa den e mercado laboral compara cu 23,362 (70,7%) hende homber.

Y segun e ultimo cifra pa 2015 hasta a conoce un shift caminda cu mas hende muher a participa den mercado laboral cu 66,7 % cu ta 23,915 y hende homber cu 58,6% cu ta 21,010.

 

Alabes den e arena politico tambe e participacion di hende muher a crece y awe nos por ta orguyoso di tin un pais cu tin mas participacion di hende muher cu tin influencia.

Un di e puntonan di atencion ta pa yega na un ‘gender parity’ caminda tin mesun hopi hende homber cu hende muher den un organizacion, esaki ta un meta ambicioso, pero e ta bon pa semper tin e den mente.

E punto di bista di politiconan femenino ta importante, politica ta keda un ambito cu ta ser domina pa hende homber caminda cu hopi biaha pa competi e ser femenino ta purba di imita e hende homber dor di trata di ta rabia of grita sin tin mester.

 

E politiconan femenino ta diferente y nan voz mester resona sin mester di grita of bira agresivo. E politica di awendia rond mundo no ta facil, e ta rekeri hopi sacrificio, oranan largo for di cas y mester soporta hopi insulto, Jennifer Arends Reyes a sigui comenta.

E no ta keda un profesion cu lo ta atractivo pa hende muher, pero e ta uno sigur importante. Fuera di e participacion real den politica naturalmente cu nos tin hopi mas pa traha riba dj’e pa avance di nos hende muhernan.

 

Por ehempel salario p’e mesun trabou ta keda diferencia cu un averahe di 700 florin. Aunke cu mester bisa cu e loonkloof manera nan ta yame den sector priva di desigualdad salarial den 2011 tabata 18.8% y awor na 2015 el a baha te na 13.3% kiermen en todo caso pa Aruba por bisa cu nos ta bayendo den e bon direccion pa kita e descriminacion riba pago igual p’e mesun posicion.

 

Aruba su hendenan muher ta hendenan balente, trahador y valioso como cu nan t’e weso di lomba di cada hogar.

Ta importante pa nos traha hunto como comunidad pa sigui sostene nos hendenan muher.

Banda cu tin diferente bon desaroyo tog mester bisa cu ainda tin demasiado caso di muchanan hoben cu ta cay den garanan di ‘sugar daddies’, ainda tin demasiado caso di violencia domestico y abuso emocional na cas.

 

Durante e Conferencia di Hende Muher, e actriz Mericano Mira Sorvino a enfatisa e importancia pa crea un comunidad alerta pa tur sorto di abuso y e ta un persona cu ta boga pa crea concientisacion riba e topico di trafico humano.

E ta splica cu sugar daddies por ehempel cu ta un fenomeno cu Aruba conoce specialmente cu hobennan ta un forma di trafico humano of explotacion di hende.

Mayor y maestronan mester ta alerta y sigur preveni y interveni den caso cu ta sospecha di casonan asina.

 

Tambe como un isla turistico hotelnan y trahadornan di hotel y den e industria di aerolinea tin un papel importante pa ta alerta y raporta tur caso cu ta mustra sospechoso.

Internacionalmente diferente cadena di hotel y aerolinea ta afilia na asina yama ‘code of conduct’ caminda ta raporta momento cu ta sospecha actividadnan inusual manera hobennan menor di edad cu ta drenta hotel of biaha cu hendenan di edad mas grandi cu nan y ta actua sospechoso. Internacionalmente hopi caso di abuso sa pasa den hotelnan of trafico humano via di aerolineanan.

Ta yega momento pa trece mas conscientisacion p’e topico aki y pa pone sistemanan pa yuda preveni y combati casonan lamentable.

Sra Arends-Reyes su mensahe pa hendenan muher ta pa nan sa nan balor y sigui lucha pa bay dilanti den bida.

 

 

Top