Parlamentario Jennifer Arends-Reyes (AVP): Aruba su Turismo ta recuperando di un aña 2016 cu a conoce demasiado reto

Den e prome lunanan di 2017, bastante cifra y analisis ta bin dilanti di aña 2016. Un aña cu a conoce suficiente reto pa bisa cu aunke a keda stabil e tabata un aña cu si mester a dun’e un cifra e lo haya ‘matig’ of un 5 di 10 basa riba caida den diferente di nos factornan cu ta determina y midi e exito di nos Turismo, segun Parlamentario Arends-Reyes.

 

A yama diferente reunion di comision pa sigui tur desaroyo di cerca y manera cu aña a habri a invita ATA tambe pa bin duna Parlamento un splicacion di locual tabata e performance/rendimento pa 2016 y kico ta e plan di accion pa 2017, cu por cierto den e reunion aki ningun miembro di oposicion no a asisti cual a tuma luga riba un dia normal di trabou na Parlamento, e Parlamentario a comenta.

 

Un 2016 cu tabatin preocupacionan e. o. cu taxista, All-Inclusive y nos segundo mercado principal cu ta Venezuela cu a trek cu ne diferente factor negativamente.

Y pa colmo Turismo mester a keda net den momentonan dificil den 2016 un rato riba auto-pilot.  E impacto di e mercado di Venezuela a wordo sinti di e comerciantenan chikito pa esunan di mas grandi of cu ta ofrece productonan di luho. Con cu bai bin e mercado Venezolano semper a gasta hopi na Aruba. Semper ta bon pa keda auto-critico y pa refleha riba kico nos por a haci diferente y kico lo por a haci den proyeccionnan mirando cu mester por a prepara miho pa e ‘drop’ den un mercado asina principal pa nos manera cu tabata Venezuela, Parlamentario Arends-Reyes ta splica.

 

Den e cifranan pa 2017 cu ta drentando tin mas miho noticia y por wak notablemente cu diferente factor a cuminsa ‘pick up’ back. Den e añanan venidero Turismo su rol ta keda mes importante como un di nos pilarnan principal pa nos economia, pero nos tin cu keda paga tino riba e aspecto di calidad y servicio. Aruba ta propaganda un producto hopi halto internacionalmente y mester percura pa nos bishitantenan haya e experiencia cu nan ta pagando p’e. Si djis tuma e aspecto di Revpar Aruba ta den e topnan den Caribe si compara un Cuba, Santo Domingo of hasta Corsou cu tin un Revpar hopi mas abou.

 

Parlamentario Arends-Reyes ta enfatisa cu calidad mester keda central y no necesariamente cantidad. Otro islanan ta hopi mas grandi cu Aruba y conoce expansion di camber hopi grandi cu na su turno lo ta inhusto casi pa sigui compara Aruba cu ne. Si pone esaki den perspectiva y compara locual un Santo Domingo p. e. ta expande den inventario di camber pa aña ta Aruba su intentario total.

E cifranan cu ta pronostica pa e. o. Banco Central den e Economic Outlook pa 2017 ta bastante conservativo y lo mester percura pa nos cifranan keda stabil y positivo cu of sin Venezuela.

 

Lo mester haci un analisis di kico nos ta haciendo bon y kico lo por ahusta y siña di 2016 pa nos ta bon prepara pa futuro. Turismo ta wordo influencia hopi pa factornan externo y aki ta caminda mester navega den un clima pa mitiga risiconan, keda efectivo y dinamico.

Aruba lo mester percura primordialmente pa keda enfoca riba authenticidad, amabilidad, calidad y servicio excelente!, ta locual Parlamentario Arends-Reyes a duna di conoce.

Top