Parlamentario Jennifer Arends-Reyes (AVP): Colegio Arubano mester keda un scol solido y cu tur ta disfruta di ta forma parti di dj’e

Parlamentario Jennifer Arends-Reyes ta splica cu ta varios biaha Colegio Arubano ta den noticia pa motibo di situacion relata cu rector di e scol. Colegio Arubano ta nos HAVO/VWO scol mas grandi na Aruba cu den pasado a yega di conta cu un populacion di 2200 alumno.

Na e momentonan aki tin mas o menos 1600 alumno cu ta bayendo Colegio Arubano.

 

Colegio Arubano tin un balor sentimental hopi grandi pa hopi adulto awe como cu e miho tempo di nan hubentud cu nan a pas’e den compania di amistadnan eynan y a ricibi bon guia di e docentenan. Tabatin un temporada caminda cu e percentahe di alumnonan cu ta slaag di nan examen a baha significativamente y cu esaki a presenta un idea di parti SMOA pa trece un ‘cambio di cultura’ of un ‘cultuur omslag’ manera cu a yam’e e tempo ey pa motibo cu esaki lo tabata necesario, Arends-Reyes ta splica.

 

A base di e pensamento cu e organisacion aki lo ta funciona di un acercamento ‘top’ -‘down’.

A purba tur sorto di manera pa purba tene nos docentenan yiunan di tera for di e seleccionnan pa duna preferencia na candidatonan externo cu un salario halto pa motibo di contract.

Esaki mester bisa cu a purba na varios ocasion pero cu resultadonan cu no tabata sostenibel.

 

Nos docentenan considera como yiu di tera conoce e cultura di Aruba, nos hobennan y e metanan pa yega na miho resultado mas miho cu cualkier teoria di afo. No por t’asina cu nos docentenan no por haya un chens pa haci nan carera den Enseñansa y promove pa posicionnan clave den e organisacion. Ora cu e rectornan riba contract bula afo, tur e presion ta cay riba nos docentenan local pa tene tur e procesonan den man, pues si nan por carga e scol den momentonan turbulento nan merece di yega un dia na e titulo tambe, Arends-Reyes ta expresa.

 

E docentenan di Colegio Arubano semper a boga pa haya un participacion real den e decisionnan pa cu e scol y su futuro. Traha riba analisis, plan di accion, maneho di idioma, plan di scol ta e docentenan semper a traha riba nan y ta nan mester ehecutanan pues nan lo mester tin hopi di bisa. Un ‘medezegenschapsraad’ pa docente semper tabatin miedo di dj’e, pero ta lubida cu pa un organisacion funciona ta e trahadornan mester duna nan aporte 100% y sinti nan mes balora como parti di un scol prestigioso na nos isla, e Parlamentario ta mustra.

 

Segun Arends-Reyes, si reconsidera pa crea un base solido di un asercamento mas tipo ‘bottom – up’ caminda cu maestro y alumno tin mas input, Colegio lo por sigui cosecha exito y sigui enfoca riba e talento, excelencia y animo cu tin tanto den personal como alumno.

Top