Parlamentario Jennifer Arends-Reyes (AVP): Cu introducion di un Gaming Board nobo pa Casino y catocheronan Aruba lo tin un bista mas structura riba ‘gambling’

Parlamentario Jennifer Arends-Reyes ta conta cu tabatin diferente Casino den noticia ultimo tempo y sigur Parlamento a sigui tur e desaroyonan di cerca.

Desde 2015 caba e comision di Finansa y Economia a cuminsa reuni cu diferente entidad tanto na Aruba como Corsou tocante e concepto di ley pa supervision riba wega di placa y introduccion di un Gaming Board cu mas tarea specifico. E permisonan pa opera un Casino na Aruba basicamente ta mara na un hotel. Ta asina cu na Aruba tin varios hotel cu ta opta di laga un tercera persona, hopi biaha inversionistanan di afor opera Casinonan.

 

Ta conoci tambe, segun e Parlamentario, cu e supuesto fenomeno cu algun ta opta pa no pasa den e proceso rigoroso di ‘due diligence’ pa habri un cuenta di banco local cu tur e consecuencianan cu esey por trece cu ne.

No tin bista registra rib’e finansa, flow di placa, stabilidad y cumplimento di e compania y sigur esaki no ta algo deseabel. Mas ainda cu Aruba mester cumpli cu e leynan internacional contra labamento di placa y combatimento di terorismo. Un Casino ta keda un negoshi di risico halto pa cualkier banco pero na final di dia e ta necesario pa regla nan asuntonan financiero via instancianan oficial y respetando y cumpliendo cu exigencianan p’asina tin miho control y bista riba negoshinan cu ta envolvi placa.

 

Nos hermana isla Corsou conoce un Gaming Board cu personanan specialisa riba control y risiconan di Casino. Lo ta bon pa na Aruba bin cu un sistema cu tin mas control structura riba ‘dropboxes’, inversionistanan y ‘pre-due diligence’ cu lo mester por cuminsa caba standard via sistemanan digital internacional pa background check na momento cu bay pidi un ‘vestigingsvergunning’ prome cu haña un green light pa opera.

  1. o. nos economia ta wordo afecta dor di posibel ‘leakages’ di fondonan cu no tin bista riba nan. Dor di crea mas control na momentonan crucial e lo yuda facilita pa cosnan cana mas miho.

 

Parlamentario Arends-Reyes tambe ta di opinion cu lo ta un idea pa considera un ‘insolvency/emergency fund’ mara na condicionnan pa Casino por paga nan trahadornan y gastonan di operacion pa algun luna na momento cu encontra problema financiero.

Esaki lo mester tin p. e. condicionnan estricto mara na dj’e pa evita su mal uzo y cu lo descurasha companianan di operacion pa bay ‘failliet’ y bolbe habri bek bou otro nomber cu un ‘clean sheet’ despues di tempo.

Esakinan ta puntonan cu lo por wordo tuma den consideracion na momento cu lo mester implementa e ley di ‘supervision pa weganan di placa’ cu pronto lo ta tratando den Parlamento.

 

Den e concepto di ley cu tin na Parlamento e Gaming Board nobo pa Aruba lo mester por conseha y tin hopi bon bista rib’e procesonan di tanto Casino como di e catocheronan.

Sigur un ley cu ta bon pa pais Aruba p’asina tambe nos por tin nos leynan ‘in place’ mescos otro paisnan den Caribe, Parlamentario Arends-Reyes a conclui.

Top