Parlamentario Jennifer Arends-Reyes (AVP) – ‘Nos Turismo durante e signatura di Gobierno di AVP a conoce stabilidad y exito’

Segun Parlamentario pa e fraccion di AVP, Jennifer Arends-Reyes, den calidad di Presidente di comision di Turismo di Parlamento, ta bisa cu pais Aruba a conose un stabilidad den nos pilar economico cu poco pais na mundo por papia di dje.

 

Na momento cu pais Aruba a conoce retonan grandi, segun locual cu tur e rapportnan di entidadnan grandi reconoci mundialmente manera Standard & Poors, Fitch rating y IMF, a subraya e dependencia y necesidad di pais Aruba riba un Turismo exitoso, y asina a logra tambe cu durante transcurso di añanan e ingreso di Turismo a subi substancialmente.

 

N’e momentonan aki Aruba ta na un crusada y cambio di un Gobierno stabil, pa un Gobierno di  coalicion, y ya caba ta un cantidad di advertencia a ser treci dilanti na tur NV y sui generis.

Un advertencia cu particularmente cu a hala atencion di sra. Arends-Reyes tabata esun dirigi na Aruba Tourism Authority (ATA).

Aki partido MEP, como e partido mayoritario den coalicion, a manda e mensahe pa ATA pa nan para tur proyecto pa 2018 pasobra MEP tin un otro vision pa nos turismo y tin su propio plan.

Mester corda cu durante e gobernacion di signatura di MEP den pasado, turismo no tabatin e prioridad cu e mester, como cu nos turismo ta representa 86% of mas di Aruba su GDP.

Pero tambe mester keda recorda cu durante e Gobierno di Gabinete Mike Eman 1 y 2, nos turismo si a haya su prioridad mereci.

 

Prome cu 2009, tempo cu partido AVP a haya e mandato absoluto di pueblo pa asumi e responsabilidad di Gobierno di Aruba, turismo crucero no tabata surpasa 500 mil pasahero.

Awendia, nos ta surpasa 750 mil pasahero y ta sperando pa 2018 pa e suma aki crece substancialmente.

Durante e ultimo simposio di turismo crucero cu a tene na Aruba, representatenan di partido MEP a briya cu nan ausencia, y no a presencia e presentacion di e masterplan di APA (Aruba Ports Authority) cu tin corelacion directo cu nos turismo y su futuro.

 

Sra. Arends-Reyes ta spera cu no lo bay hasi saltonan descabeya pa cu nos mercadeo di turismo y corta drasticamente den e presupuesto, di manera cu ATA no lo por funciona eficientemente atrobe.

Si bay mira bek, nos por corda cu semper e critica di mas grandi di parti di fraccion di MEP tabata encuanto e presupuesto di ATA, pasobra segun nan (MEP), e rendimento di locual ta inverti den ATA no ta keda refleha bek den economia. Pero loke cu partido MEP no ta bisa ta cu nos ta hayando casi 3 biyon for di turismo, segun banco central.

 

“Nos Turismo ta asina importante pa Aruba y cualkier ‘bad decision’ por tin consecuencianan hopi grandi pa nos isla y su economia.”

Ta hopi mama y tata di famia ta depende di e mercado di turismo.

Sra Arends-Reyes ta spera cu sano huicio prevalece y locual ta den bienestar di Aruba wordo poni na prome lugar.

 

Jennifer Arends-Reyes ta bisa cu lo ta bon pa splica cu tur e entidadnan di e industria turistico na Aruba ta trahando riba e mesun linea, y ta depende di otro.

“Si ATA, por ehempel, cay afor of no por funciona manera debe ser, esaki lo tin consecuencia pa e otro stakeholders, incluyendo hotelnan, y tin impacto ariba inversionistanan tambe.

Awendia ATA ta un sui-generis pasobra nan mester por tin netamente un grado di independencia pa por hasi nan trabou.

Grado di ocupacion di cambernan di hotel no ta aumenta pa obra di magia, ni tampoco ta warda ariba Gobierno nobo pa decisionan wordo tuma.

Nos tin, por ehempel, un AAA cu tin un plan Gateway 2030, APA cu su Masterplan y ATA cu ta percura pa keda mercadea Aruba den e mundo sumamente competitivo eyfor, caminda cu Aruba ta den e topnan di Caribe.

Nos no lo por acepta pa Aruba bay atras pa locual ta turismo, cu ta nos pilar economico.” Sra Arends-Reyes ta termina bisando.

 

 

Leave a Reply

Top