Parlamentario Jennifer Arends-Reyes (AVP): Turismo di Aruba a sigui contribui cu mas cu 2.9 biyon florin na economia di Aruba den 2016

Den calidad di presidente di comision di Turismo tabata presente huntu mas miembro di e comision Parlamentario. E comision a haya dos presentacion extenso tocante e reportahe anual di 2016 di e rendimento di ATA y con Aruba como destinacion a ‘perform’.

Tabatin diferente punto cu a sobresali, manera e mercado di Venezuela y su caida cu tabata uno drastico pa Aruba como cu Aruba ta e destinacion turistico nr. 1 pa Venezuela compara cu otro islanan den Caribe. ATA Aruba Tourism Authority a percura pa inverti mas fondo den e mercado Norte Mericano p’asina compensa e caida di Venezuela, segun sra. Arends-Reyes.

 

Tambe un aspecto importante tabata locual cu Turismo a contribui na e economia di Aruba den 2016. Aruba tin un dependencia hopi grandi riba Turismo y 2.9 biyon di florin ta un suma hopi significativo pa Aruba. P’esey e strategia y maneho di destinacion ta hopi importante pa Aruba.

E strategia cu a uza pa pone mas enfasis rib’e mercado Norte Americano a funciona hunto cu e crecimento di mercadonan den Latino America cu no mester di Visa mas manera Colombia y Peru. Colombia y Peru a crece den cantidad di bishitante pa Aruba y esaki ta algo positive, sra. Arends-Reyes ta splica.

 

Un otro punto tambe cu a bin dilanti ta cu e grado di ocupacion di nos hotelnan a keda semper halto. Aruba como destinacion mester keda enfoca riba calidad y esaki tambe tabata e caso pa 2016. E balansa entre prijs, grado di ocupacion, volumen y locual nan ta gasta na Aruba ta keda importante. Cada factor cu baha ta trek otro kiermen e mester percura pa tur factor keda den balanse. E turismo crucero tambe ta uno cu tin desaroyo positivo.

Tambe e comision di Turismo a ricibi un presentacion en corto rib’e futuro di Turismo den e forma di e Destination Development Plan. Y basicamente mester keda enfoca riba calidad, experiencia y organisa eventonan cu ta authentico y cu ta atrae gruponan specifico, sra. Arends-Reyes ta termina bisando.

Top