Parlamentario Jennifer Arends-Reyes: Lo tin un periodo di transicion pa e centronan di cuido di mucha por prepara y upgrade nan mes

Segun sra. Arends-Reyes, despues cu fraccion di AVP a haci diferente bishita na centronan di cuido di mucha den diferente districto na Aruba y haci tambe un inventarisacion como deber di legislado di e preocupacionnan cu tin den e mundo di cuido di mucha.

 

Recientemente, fraccion di AVP a sinta hunto cu Minister pa papia tocante e preocupacionnan cu a bin dilanti pa trece algun sugerencia dilanti. Den e concepto di ley actual cu tin riba mesa, ta pa percura pa por garantisa un miho calidad den e centronan di cuido di mucha.

Naturalmente cu prijs ta hunga un rol, pero no mag di compromete calidad pa motibo di prijs.

Un factor cu ta prescribi den ley na otro paisnan cu a logra pasa un ley pa centro di cuido di mucha manera na Hulanda, Corsou y Boneiro ta e cantidad di mucha pa begeleider.

 

Segun sra. Arends-Reyes, ta parti den diferente seccion segun edad, p. e. si tuma di 0 pa 1 1/2 aña na Hulanda ta 4 mucha pa 1 begeleider, Corsou y Boneiro tin e na 6 mucha pa begeleider y Aruba ta proponiendo mescos cu p. e. Corsou. Y locual a constata ta cu na Aruba e ratio pa e edad aki den algun centro ta casi dobbel, aunke cu mester bisa si cu tin algun centro cu si lo ta cay bou di e 6 mucha pa begeleider.

 

Tin algun centro tambe cu tin hulp begeleiders, pero asina mes e cantidad ta keda hopi pa supervisa. Ta spera cu lo por bin cu un nota di cambio cu lo ahusta e ratio toch un poco p’asina yega na un ‘middle ground’ cu ta un poco mas realistico na e situacion actual na Aruba sin cu mester compromete e calidad.

Sra. Arends-Reyes ta splica cu asina mes tambe den e ley algun rekisito ta vigente manera cu e ley pasa y algun rekisito manera e ratio di mucha pa begeleider of otro inversionnan den infrastructura of opleiding tin un periodo di transicion rasonabel.

 

Locual tambe cu lo ta un punto cu di parti di Gobierno a compromete pa set-up y cubri su gasto lo ta un tipo di curso part-time pa e begeleidernan, e begeleidernan lo mester enfoca riba 5 punto di desaroyo di un mucha, su desaroyo emocional, fisico, cognitivo, social y tambe traha riba desaroyo di lenguahe.

 

Durante e bishitanan cu a haci na e centronan di cuido por a nota cu tin diferente begeleider cu tin amplio experiencia y cu facilmente cu un evaluacion lo por yuda nan yega na un cualificacion di bekwaamheid pa traha cu mucha. Ki nan e funcion di e inspector nobo encarga cu e cumplimento di e ley di centro di cuido di mucha lo mester ta uno activo.

 

Sra. Arends-Reyes ta splica cu Aruba ta ‘long overdue’ cu e ley aki mirando cu Hulanda, Corsou y Boneiro cu ta directamente parti di reino ya tin e ley aki ‘in place’ pa hopi aña caba. E ley aki mester ta uno positivo na beneficio di nos muchanan y asina tambe contribui na un tiki mas structuracion den e parti importante di cuido y proteccion di nos ciudadanonan di mas chikito.

Nos ta na aña 2017 y pa ainda nos pais no tin bista y control oficial regla pa ley rib’e centronan di cuido di mucha sigur no ta un opcion mas.

Top