Parlamentario Marlon Sneek: Andin Bikker splica pensionadonan con nan lo por biba su 700 florin pa luna

Campaña electoral ta den full swing y ya caba por tuma nota cu tin politiconan cu simplemente no ta pone futuro interes di pueblo na prome lugar, pero ta schuif y insisti pa nan interes politico personal, ta riba tur cos.

Andin Bikker lider di PDR y number dos di POR ta un di e politiconan aki, ora cu e insinua cu su partido, un di nan dos cu e ta representa na e momentonan aki, lo bay baha e edad di pensioen bek na 60 aña.

 

Andin Bikker no ta splica pueblo con e lo atende cu tur e consecuencianan cu un decision asina lo bay percura p’e, pero ta menciona algun medida cu simplemente ta un vision politico ridiculo, sin contenido y formando un peliger serio pa entrada di pensionadonan pa futuro.

Lider di fraccion di AVP,  Marlon Sneek ta sigui mustra cu ta muestra grandi di iresponsabilidad pa Andin Bikker trece e tipo di ganga politico aki dilanti, sin splica pueblo seriedad di tal pensamento, di tal vision.

 

Marlon Sneek ta sigui mustra cu ya cantidad di organisacion sindical y otro gruponan na Bonaire, a hinca un plan den otro pa pone e isla plat pa evita un tipo di decision asina, ya cu nan ta mira e peliger grandi di reduccion riba nan pensioen si introduci e tipo di cambio aki.

Na mes momento Marlon Sneek di AVP ta mustra cu Andin Bikker mester pone su mes na altura di e consecuencianan aki, y por tuma ehempel di loke ta pasando na nos hermana isla di Corsou, caminda tambe a introduci e tipo di pensamento di politica populista aki, cu e consecuencia cu pensionadonan cu bay cu pensioen cu edad di 60 aña, lo mira nan entrada mensual keda reduci for di 1008 te na 700 florin pa luna, cu  tur consecuencia su esaki lo trece p’e hendenan aki.

 

Andin Bikker mester bin splica pueblo na mes momento, con e ta kere cu e lo por haci e cambio aki, sin cu e lo percura pa problema serio cu entrada di e pensionadonan ya cu storianan politico sin sentido, ta percura pa brinda un perspectiva sin sentido p’e pensionadonan.

Loke ta mas serio di henter e asunto aki, segun Marlon Sneek, t’e hecho cu tanto Andin Bikker como Evelyn Wever Croes y otro miembronan di oposicion, ta brindando pueblo di Aruba, un solucion cu ya no a funciona pa hopi tempo y dos cu Gobierno di MEP no a atende cu e asunto aki casi 15 aña pasa, e fondo di pensioen tabata coriendo peliger di colapse total sin futuro pa pensionadonan.

 

Mester tin mas seriedad, caminda politiconan di oposicion mester mustra mas responsabilidad ora cu kier presenta nan vision cu mester ta basa riba cosnan realistico na luga di presenta cosnan cu ta bay trece problema serio pa pensionadonan den futuro, lider di fraccion di AVP, Marlon Sneek a declara.

 

Top