Parlamentario Melin Tromp: Pueblo ta vota na 2009 den forma decisivo pa “Ban P’e Cambio”

Tanto den e proceso electoral di 2009 y despues na 2013, pueblo di Aruba a manda un mensahe cla pa partido MEP despues di 8 aña di mal gobernacion caminda votadornan a mustra nan desaprobacion total p’e maneho cu e Gobierno geel a hiba.

Parlamentario pa fraccion di AVP, Melvin Tromp ta mustra cu e mensahe aki cu na dos ocasion a duna lidernan di MEP, palabra di pueblo ainda no a drenta den cabes di politiconan di MEP.

 

“Ora cu nos mira e lema cu e lider di MEP, Evelyn Wever Croes y algun otro colega di dje den e partido ta duna na pueblo di Aruba, anto no por conclui algo otro cu dirigentenan di MEP no a compronde e mensahe di pueblo n’e partido.

‘Ban p’e Cambio’ t’e mensahe cu lider di MEP ta hibando pa votadornan rond di nos isla, ya cu segun MEP,  nos pueblo tin mester di un cambio, pero na mes momento tur hende ta ripara tambe bon cla, cu e cambio cu Evelyn ta papia di dje, no tin contenido.

 

Ningun caminda e lider di MEP of cualkier hende di su partido ta splica pueblo kico t’e cambio cu MEP ta ofreciendo na pueblo, esta kico nan ta bay haci diferente despues di tanto desaroyo cu Gobierno di AVP a trece den e pais aki despues cu pueblo a condena MEP pa su mal gobernacion.

Na 2009 Gobierno di MEP a bay laga un fondo di pensioen na rand di bancarota, scolnan cayendo den otro, desempleo demasiado halto y un pueblo cu den 8 aña di gobernacion di e partido aki, no a haya ningun clase di ayudo serca e Gobierno geel.

 

Loke si pueblo por a ripara  despues di e periodo di gobernacion aki, ta cu famia y amigonan a bay cu mas cu 28 miyon di placa di pueblo, ya cu ta solamente e grupo aki a beneficia di e maneho desastroso cu e partido di Evelyn a hiba.

No tabatin placa pa pueblo, no tabatin beneficionan p’esnan mas vulnerabel den nos comunidad, no tabatin desaroyo den centro di Oranjestad, no tabatin progreso economico ni comercial, y problemanan social a lanta cabes den forma alarmante.

MEP a haya dos mandato di pueblo pa percura pa un desaroyo positivo pa nos pueblo, pa henter e pais, pero a prefera di sirbi un grupo chikito di famia y amigonan y aki ta caminda pueblo a dicidi den e proceso electoral di 2009, cu nan mester a bay pa ‘E CAMBIO.’

 

Un Gobierno di MEP cu a haya miyones for di BBO, cu a haya miyones for di diferente entrada adicional cu a drenta, pero nada di esaki a bay pa bienestar di felicidad di nos pueblo.

Ta partido MEP a dicidi di no papia mas cu e compania Valero, hasta e bisa oficialnan di e compania, pa pone e refineria di San Nicolas riba nan lomba y bay cu esaki Merca.

Consecuentemente e refineria a dal su porta sera cu tur consecuencia cu esaki tabatin p’e desaroyo economico di nos pais.

Kico t’e cambio cu Evelyn y MEP ta papia di dje, ya cu pueblo no sa di e contenido di e cambio aki y consecuentemente t’e unico cambio cu pueblo ta kere cu lo tuma lugar, ta cu famia y amigonan lo ta bek den ‘business,’ probechando di caha di pueblo, pa bira rico cu sodo di pueblo, mientras cu pueblo un biaha mas lo para un banda mira con Gobierno di MEP lo bolbe lubida riba pueblo,”  Parlamentario Melvin Tromp ta señala.

Leave a Reply

Top