Parlamentario Melvin Tromp di AVP – Pa falta di argumento valido opositornan politico ta recori pa gañamento y insulto

“Pueblo votado mester ta alerta den e dianan aki, ya cu ta bisto cu opositornan politico ya no tin argumento valido contra 8 aña di desaroyo y progreso positivo cu Gobierno di AVP a logra pa su pueblo”.

Parlamentario Melvin Tromp di fraccion di AVP a mustra cu den proximo simannan prome cu eleccion, pueblo por bay spera cantidad di storia fabrica, uno mas loco cu e otro, ya cu no tin argumento logico pa sconde e desaroyo grandi cu pais Aruba a conoce bou di Gobiernonan di AVP.

 

“Ta increibel con contrincantenan politico ta dicidi di acudi n’e tipo di politica aki, tratando na manipula opinion di pueblo, cu mentira y gritonan bagamunderia cu nan mes ta inventa y fabrica pa despues manda esakinan riba rednan social.

Sinembargo aki nos ta kere cu pueblo di Aruba ta haya un opinion bon cla di e mentalidad cu opositornan politico tin ya cu ora politiconan no por ta sincero cu pueblo cu argumentonan valido durante di campaña electoral, ta con nan lo por ta sincero cu pueblo den gobernacion.

 

Na lugar di tuma tempo y bisa pueblo kico t’e vision politico cu nan tin pa yuda pueblo y percura pa un mihor desaroyo pa nos pais, opositornan politico aki ta hinca asina hopi tempo pa fabrica cosnan cu no tin sentido pa papia ariba y ta pretende di malinforma pueblo riba partido AVP.

Ta increibel cuanto esfuerso ta ser haci pa politiconan di opositor, pa trata di mancha credibilidad di politiconan di AVP,  kendenan tin 8 aña ta trahando pa nos pais, y percurando pa un progreso cu nunca antes den historia di nos pais, nos a yega di conoce.

 

Mester condena totalmente maniobranan cu ta wordo haci, caminda e.o. ta produci un candela riba dump na Parkietenbos durante ora cu casi anochi ta yegando, pa dos dia despues e lider politico bay prensa y papia cu e tin solucion p’e dump.

Ta muestra bon cla cu e tipo di accionnan aki ta wordo fabrica cu mal intencion p’asina trata di gana simpatia di e pueblo votador, ya cu realmente no tin argumento valido pa uza contra di un Gobierno di AVP cu tin 8 aña trahando pa progreso di henter nos pais.

 

Tur tipo di argumento cu a wordo inventa caba contra di nos Gobierno, a wordo desbarata pa nos propio pueblo ya cu den tur bario, den tur skina y den tur casnan rond di nos isla, e maneho cu a ser hiba ultimo 8 aña pa Gabinete Mike Eman I y II, a wordo sinti.

AVP a percura pa hiba un maneho pa pueblo, cu envolvimento di pueblo pa sirbi interes di nos pueblo y contra di un maneho asina, oponentenan politico no tin argumento valido pa presenta pa trata di hustifica argumentonan mentiroso, colma cu insulto.

 

Pueblo por spera cu den proximo dianan, mas di e tipo di informacionnan difamatorio y mentiroso lo sigui bin dilanti, ya cu oponentenan politico ta desespera p’e sosten grandi cu tin den pueblo pa Gobierno di AVP,” Parlamentario Melvin Tromp a mustra.

 

 

 

 

Top