Parlamentario Melvin Tromp: MEP hibando campaña di mentira cu promesanan falso sin splicacion hustifica

E tendencia politico di e campaña electoral di partido MEP ta bisto for di algun luna caba, esta di lansa promesanan sin sentido na pueblo, sin duna un solo splicacion kico lo t’e solucion cu nan lo por tin pa goberna e pais.

Parlamentario Melvin Tromp di fraccion di AVP ta mustra cu partido MEP bou liderazgo di Evelyn Wever Croes, a bira un partido sin vision politico cu ta sirbi interes di pueblo y for di argumentonan cu e partido a bin ta plamando den pueblo, ta hopi cla cu partido MEP no tin ningun idea con pa duna un aporte na un mihor progreso pa pueblo di Aruba.

 

“Pa un partido cu pueblo a castiga severamente den e dos ultimo eleccion tanto na 2009 como na 2013, pueblo ta spera mas seriedad, sikiera pa miembronan di MEP mustra cu nan a compronde e mensahe serio y cla cu pueblo a manda p’e partido aki despues di 8 aña di mal gobernacion.

Cantidad insinuacionnan ta skeiro rond y claramente por mira cu partido MEP kier sembra panico den pueblo, caminda no tin motibo pa panico, tratando di tapa un desaroyo asina positivo y asina impresionante manera cu nos pueblo a conoce den tur skina di Aruba den ultimo shete aña.

 

Un disparate por completo ta loke e politico veterano di MEP, Glenbert Croes ta bisa cu pueblo ta bira pober c’un Gobierno di AVP, pero cu Gobierno di MEP pueblo lo bira rico.

Sin duna splicacion con e lo haci esaki, for di unda e ta bay saca e placa y aki Glenbert ta lubida por completo ta kendenan a bira rico cu Gobierno di MEP na mando for di 2001 te cu 2009.

Ta cua famia a bira mas rico cu pueblo cu contractnan grandi di edificionan y otro beneficionan y ta dificil pa kere cu Glenbert no ta na altura ta kende a probecha di Gobierno di MEP, cu sigur no tabata pueblo di Aruba.

 

Otro miembro di MEP mal bruha pa Dangui Oduber, kende ta pretende di tin experencia pa loke ta turismo di nos pais caminda despues cu MEP no a haya solucion durante 8 aña p’e hotel na Bushiri, awor diripiente ta traha un pintura di un boutique hotel y ta pretende cu esaki lo bira un boutique hotel di 5 strea.

Un declaracion sin pia ni cabes ya cu na prome lugar Dangui y partido MEP, cu a cumpli 47 aña di existencia, ta bon na altura cu pa un hotel wordo califica como uno di 5 strea, e ta rekeri minimo un total di 250 kamber y tambe e hotel mester tin un casino, loke sin duda un boutique hotel lo no tin.

 

Ta gritonan  desespera di politiconan desespera cu ya no sa kico pa bisa of pa haci, cu lo por mustra mihor cu e desaroyo cu Gobierno di AVP si a percura pa duna pueblo di Aruba den ultimo shete aña.

Ya caba Conseho di Minister a dicidi cu lo kita e edificio di ex Bushiri Hotel y lo habri e sector aki pa pueblo por gosa di dje y lo crea tambe facilidadnan deportivo pa practica beach tennis y beach soccer, dunando e area aki un contenido mas realistico pa sirbi interes di pueblo.

E momento a yega pa partido MEP mustra mas seriedad, stop di papia disparate politico sin pia ni cabes ya cu pueblo den ultimo shete aña por a mira y sinti na unda su placa a bay den  proyectonan cu ta na interes di pueblo den su totalidad y no pa famia y amigonan so,” Parlamentario Melvin Tromp a declara.

 

 

 

 

Top