Parlamentario Melvin Tromp: MEP kier drecha fondo di pensioen cu a ser drecha despues di nan desaster

Casi 8 aña a pasa cu pueblo a dicidi cu partido MEP no ta serio y no ta un partido cu ta goberna na interes di pueblo. Sinembargo 8 aña despues ainda por tuma nota cu integrantenan di partido MEP y principalmente su lider, ainda no a compronde e mensahe cu pueblo a duna e partido tanto den eleccion di 2009 como esun di 2013.

Parlamentario di fraccion di AVP, Melvin Tromp ta mustra cu ora cu scucha miembronan di fraccion di MEP dirigi nan mes na pueblo den nan campaña electoral, nan ta trece mensahenan cu simplemente ta cosnan dificil pa pueblo kere y pueblo confia.

 

“Gritonan politico sin contenido, expresionnan sin base di credibilidad ya cu na momento c’un politico veterano manera Ady Thijssen papia cu ‘MEP si lo bin cu desaroyo pa progreso di un y tur’, pueblo y nos tambe ta puntra ta kico a pasa anto for di 2001 te cu 2009?

Unda e progreso pa un y tur a keda e tempo ey y Ady mas cu ningun mester ta bon na altura tur kico su partido a haci malo den gobernacion di nos pais, cu a laga henter nos pueblo den un situacion di incertidumbre cu problemanan serio riba tereno di finansa y economia.

 

Ta hendenan di MEP den e dianan aki ta tribi di papia riba fondo di pensioen, con nan lo bay drecha esaki lubidando cu e fondo di pensioen na 2014 a caba di wordo drecha pa sigura su existencia p’e proximo 30 aña, despues cu Gobierno di Ady Thijsen y MEP, a laga e fondo na rand di bancarota.

Expresionnan di MEP riba e fondo di pensioen ta pone nos bay bek na un lema di campaña cu partido MEP a crea cu ta bisa: “#sin miedo”, wel den e vision sin contenido di MEP, enberdad pueblo mester tin miedo cu e hendenan aki kier bay drecha un fondo di pensioen cu ya a wordo drecha y sigura, y transforma esaki den e skelet cu nan a laga esaki aden ora cu pueblo a manda e gobierno geel cas na 2009.

 

Mientras cu partido MEP ta pidi pueblo pa vota p’e partido aki sin miedo, en realidad pueblo ta consciente cu e mester tin miedo di un partido cu no a cambia di vision y di pensamento den ultimo 8 aña den oposicion.

Ainda e mesun mentalidad ta sigui existi, caminda amigo- y famianan cerca di integrantenan di MEP ta sigui uza tur forma posibel pa hiba un campaña negativo contra di Gobierno di AVP, ya cu realmente e situacion di e amigo y famianan aki, ta birando delicado.

 

Na 2009 e cranchi di placa di pueblo p’e gruponan aki, a dal sera y no a habri mas y consecuentemente e desesperacion ta asina grandi cu por scucha cantidad di disparate den e campaña electoral aki.

Entre otro por a scucha Parlamentarionan di MEP papia cu AVP ta brasa corupcion, lubidando por completo cu pa 8 aña largo tin miembronan di e fraccion aki a sostene un Minister cu a wordo condena pa falsificacion di documento y el a sostene un Minister di MEP cu Gobierno di Reino a bula bin Aruba bin ranca cartera for di e Minister y laga e Minister aki cu solamente su salario pa cobra.

 

No a scucha e gritonan di pueblo cu tabata pasando den situacionnan dificil, mientras cu famia di integrantenan di MEP tabata ranca miyones for di caha di pueblo na huurmento di edificionan y hasta a bay na cambia clausula di contract cu tabata firma caba, p’asina nan por a sigui cobra pa un tempo mas largo.

Ta un suma di alrededor di 28 miyon a bay na solamente huurmento di edificio y ningun miembro di fraccion di MEP a lanta para y bisa cu esaki no por na nomber di pueblo.

 

Campaña electoral ta den ambiente pero seriedad y honestidad di oposicion no por wordo mira y scucha ningun caminda,” Parlamentario Melvin Tromp ta mustra.

Leave a Reply

Top