Parlamentario Melvin Tromp: Raport di CAFT un biaha mas ta sera boca di MEP y PDR-POR

 

 

Un biaha mas por ripara cu oposicion simplemente no por caba di acepta, e seriedad cu Gobierno di AVP ta gobernando e pais for di 2009 te cu awor y e ultimo raport di CAFT relaciona cu presupuesto 2017, tampoco a cay bon tera serca esnnan cu a bin ta cuestiona y critica esaki.

Parlamentario Melvin Tromp di fraccion di AVP ta mustra cu pa algun tempo caba, tanto partido MEP y ultimo tempo e combinacion di PDR-POR, ta cuestionando presupuesto di e pais pa 2017 caminda hasta algun a cuminsa mira den bola di crystal cu nan tin, cu pa presupuesto 2017 lo tin un buraco grandi.

 

“Hasta e cifra di 140 miyon florin a wordo menciona pa presupuesto di 2017, mientras cu partido MEP continuamente ta papia riba un finansa publico malo y hasta ta duna declaracion continuamente cu Aruba ta bancarota.

Ta declaracionnan di desesperacion, di politiconan cu ta sigui kere cu crea panico falso den pueblo, t’e mihor caminda pa nan yega na poder of convence pueblo cu cosnan no ta bon cu nos pais.

E lider di PDR semper tabata papia cu e kier keda den un forma pragmatico, pero defacto tabata haci mesun expresionnan mentiroso cu miembronan di fraccion di MEP a bin ta haciendo for di tempo cu nan ta den oposicion.

 

Sinembargo e ultimo expresionnan di e aliado nobo di Andin Bikker, esta e partido POR, tambe a tuma mesun direccion aki, sin duna opinion riba e ultimo certificacion cu CAFT a duna presupuesto di pais Aruba pa 2017.

Loke por a ripara tambe den ultimo dianan, ta cu e miembro di fraccion di MEP, Xiomara Ruiz Maduro, hasta ta papia di contenido di un carta di CAFT cu Gobierno no kier duna publicidad na dje, mientras cu e raport final di e comision di control aki, ta confirma cu Gobierno a cumpli y a duna claridad na varios punto cu e comision a haci pregunta ariba y consecuentemente a mustra cu Gobierno a cumpli cu e norma di articulo 14 lid 2 di LAFT, cu ta papia di un deficit di e sector publico di 0,5% BBP.

 

Hasta e raport ta papia cu Aruba lo por refinancia su debenan y por haci un prestamo nobo na un maximo di 438.8 miyon florin, cu ta bolbe confirma e confiansa cu tin den e maneho di Gobierno di AVP.

Aki ta bon pa pueblo ripara cu ta mesun miembro di fraccion di MEP aki, Ruiz Maduro hunto cu su lider Evelyn Wever Croes a bay Hulanda pa parti un raport cu nan a hinca den otro cu e titulo di: “Feestvierend ten onder gaan,” suplicando Gobierno di Reino pa interveni na Aruba contra e maneho di Gobierno di AVP.

Ta mesun partido di MEP cu na momento cu e comision di CFT for di Hulanda a bin Aruba, a organisa nochinan di informacion buscando pa saca probecho politico for di ponencia di e comision aki, sin un rato sali na defensa di autonomia di nos pais.

 

 

 

Aki mi tin cu mustra cu e calidadnan di gobernacion di partido AVP, ta di un taya hopi grandi, pa politiconan y nan partido cu e mentalidad micro cu nan tin, caminda CAFT y Hulanda ta mira cu enberdad Aruba tin un Gobierno serio y responsabel na mando.

Sin duda pueblo por bisa cu esaki ta bon trabou di Gobierno di AVP.

Cu e logro aki anticipa di un deficit di 0.5% nos pais ta rumbo pa un presupuesto balansa manera palabra anteriormente cual lo permiti pais Aruba, subi mercado internacional pa prestamo c’un interes hopi faborabel,  cu tur confiansa cu por tin.

 

Un desaroyo cu na mes momento lo duna nos pais un perspectiva financiero y economico asina positivo, cu esaki lo duna mas confiansa na inversionistanan di rond mundo, pa acerca nos pais pa haci inversionnan cu nan ta desea, mirando e stabilidad aki,” Parlamentario Melvin Tromp ta mustra.

Top