Parlamentario Melvin Tromp: “Tin politico cu ta bebe lechi y lubida di cua baca nan a chik’e”

Den e actual campaña electoral tin politiconan di oposicion cu ta sigui inventa cosnan pa trata di convence pueblo votador, cu nan no mester vota mas pa partido AVP.

Di tur forma politiconan ta trata di inventa un of otro argumento negativo, a trata di gana interes di nos hendenan y Parlamentario Melvin Tromp di fraccion di AVP, ta mustra cu e maniobranan aki nunca por tapa of sconde tur logra di Gobierno di AVP den ultimo 8 aña den desaroyo di nos pais.

 

“Tur caminda cu pueblo bay rond Aruba, ta mira e influencia di e vision cu partido AVP a presenta den su programanan di gobernacion, pa transforma y desaroya nos isla den e mihor forma posibel, creando un pais progresivo cu su plan di prosperidad comparti.

Tur caminda, e maneho di Gobierno di AVP a mishi cu bida di nos pueblo, den e forma mas positivo cu nos a yega di conoce desde introduccion di Status Aparte y ta un hecho cu ta dificil cualkier politico di oposicion convence pueblo pa no mira esakinan.

 

Den ultimo dianan nos por a scucha con un lider politico, cu a bandona nos organisacion politico, kende a dicidi di forma su propio partido politico p’asina e por bira yama su mes lider, ta papia disparatenan increibel, lubidando por completo unda el a wordo forma y ta kendenan a haci di su persona, e politico cu e kier a bira.

Un di e figuranan cultural y musical mas popular cu nos isla a yega di conoce, esta e gran cantante Cecil Grovel, den feliz memoria, a yega di traha un tumba cu a bira masha popular y conoci aki na Aruba y den Antias, cu ta pone nos corda riba un di su frasenan di e tumba aki, cu por describi e politico lider aki den e mihor forma posibel.

 

‘Bebe lechi y lubida di cua baca nan a chike’ t’e expresion aki, cu ta mustra cu tin hende ta lubida por completo di unda nan a bin y con nan a yega camindanan ta awe, sin cu nan tin berguensa di realisa cu ainda nan ta cargando e vision y formacion cu partido AVP a duna nan constantemente.

Ora cu scucha un propaganda politico di un lider cu ta bisa: “Pueblo ta harta di geel y berde” e ta lanta e pregunta ta con un politico asina por lubida di con e ta pretende awe cu e no sa di unda e ta bin y kendenan a forma su persona riba tereno politico y ta kendenan  brinde e oportunidad pa yega asina ley.

 

E lider politico aki a bandona partido AVP despues cu e tabata miembro activo pa 27 aña di nos organisacion berde y practicamente ainda e no a cumpli un aña cu el a dicidi di lanta su propio partido.

Es mas, henter su campaña politico y su supuesto vision politico nobo, ta carga cu ideanan di e vision berde di partido AVP, caminda algun siman prome cu el a bandona nos partido, ainda tabata elogia nos lider Mike Eman, nos coleganan Minister Beny Sievinger y tabata brasa e hendenan aki pa mustra supuesto gradicimento p’e forma con nan a traha cu su persona.

Henter su campaña politico nobo, ta practicamente mesun sistema, mesun forma cu loke el a siña y mira den partido AVP, mustrando den forma cla na pueblo, cu para pafo di nos partido politico berde, ainda e ta sigui actua manera un politico berde di nos partido.

 

Ta ki argumento e lider aki por tin pa bisa pueblo despues cu el a forma parti 27 aña largo di AVP, cu pueblo ta harta di berde y cu su color blau awor t’esun cu pueblo tin cu sostene.

Pa mi mustra con bruha e vision nobo di e lider aki a bira, tin cu mustra riba un di su candidatonan riba su lista nobo, cu a emiti un comunicado di prensa siman cu a pasa, insistiendo cu mester bay drecha transporte publico den e barionan, caminda e nobato politico aki a lubida por completo, cu ta su lider t’esun cu a maneha e compania di transporte publico ultimo 8 añanan.

Na lugar di convence pueblo c’un vision nobo, manera cu e ta pretende, pero cual vision ta igual n’e vision cu el a wordo educa y forma den e organisacion politico di AVP, ta muestra cu su decision di bandona AVP, tabata un capricho politico di dje p’e por bira lider mas liher cu por.

 

Su formacion y guia cu el a ricibi den 27 aña como miembro di AVP, t’e motibo cu tur su vision cu e tin n’e momentonan aki, ta practicamente sali for di e mesun vision cu cual el a wordo educa den nos partido AVP,” Parlamentario Melvin Tromp a duna di conoce.

 

Leave a Reply

Top