Parlamentario mr. Juan Ady Thijsen (MEP): Den e reunion publico a keda comproba cu AVP ta keda wrong and strong riba criminalidad

Diamars a tuma un lugar un reunion publico pidi pa partido MEP pa trata e problema grave di criminalidad na Aruba. Aruba ta worde azota pa criminalidad. Aña a habri cu mas criminalidad cu nunca. Ciudadanonan ta worde ataca riba caya y horta di nan pertinencianan, comercio ta ser atraca of horta. Dia di paga di salario a bira dianan di tension pa no ser atraca, segun Parlamentario mr. Thijsen.

 

Hasta den bo hogar bo no ta safe mas. Nan ta drenta cu bo tey of laga di t’ey. Pio ainda no solamente anochi pero den dia cla tambe. Tur esaki ta motibonan pa haci algo. Aruba tin 7 aña ta wardando rib’e plan di Mike Eman pa combati criminalidad.

E propio Minister di Husticia Arthur Dowers a haya e puesto di Ministro di Husticia basa riba promesanan hopi alentador. Ainda esakinan a keda como prueba riba YouTube.

 

Sinembargo, desaroyonan den nos pais a indica cu no por sigui mas cu e Minister actual di Husticia y cu Gobierno mester busca un otro persona pa ocupa e puesto y e Minister actual mester bay cas.

Segun Parlamentario mr. Thijsen den cuadro di esaki den e reunion di diamars oposicion completo a presenta un mocion pa cu esaki. Esaki no tabata e prome sino e tercer intento pa convence miembronan di Parlamento cu nan no mester scoge pa interes partidista pero atrobe e mocion a worde desaproba pa e Parlamento mayoritario di AVP.

 

Partido AVP a pinta atrobe un scenario masha positivo di e trabaonan di Minister Dowers y Gobierno di Mike Eman cual tur hende na Aruba segun Parlamentario mr. Juan Ady Thijsen sa cu no ta e realidad. Aruba ta den un crisis di criminalidad.

E Parlamentario ta sigui bisa cu esaki ta un muestra cu AVP no ta biba den realidadnan amargo di nos pais. Nan ta keda wrong and strong, segun Parlamentario mr. Thijsen.

Pio ainda indicacionan ta cu Dowers cu apoyo di AVP kier bay 4 aña mas.

 

Parlamentario mr. Juan Ady Thijsen ta alerta votadornan pa manda AVP un bon mensahe dia 22 di september venidero cu ta basta cu criminalidad cresciente na Aruba y cu Aruba ta desea un trankilidad y seguridad. Partido MEP a demostra caba di por percura pa esaki y ta cla pa duna e pueblo loke e merece.

Top