Parlamentario mr. Juan E. Thijsen (MEP): Acusacionnan di Dowers riba Otmar ta contene actonan penal, mal uzo di poder, manipulacion y corupcion den Gabinete Mike Eman II

Parlamentario mr. Juan E. Thijsen manera tur hende tambe a tuma nota di acusacionnan hopi grave di parti di Ministro di Husticia Dowers di su ex-colega Otmar Oduber ex-Minister di Turismo. E acusacionnan aki ta encera e. o. actonan penal, mal uzo di poder, mal uzo di fondonan publico y cu Otmar Oduber ta facilita y stimula e uzo di droga y alcohol como tambe embaraso hubenil. Alavez segun Minister di Husticia Dowers e tin hopi mas pa papia.

 

Parlamentario Thijsen ta puntra su mes si Minister di Husticia ta referi akinan na e avion cu a lanta madruga sin permiso.

Segun Minister di Husticia Arthur Dowers, su ex-colega a usa su poder y autoridad como Minister di Turismo pa aloca fondonan publico pa organisa actividadnan pa hubentud e. o. 5 miyon florin pa organisa e Electric Music Festival na unda hubentud ta uza droga, alcohol y stimulando mal comportacion di hubentud cu embaraso hubenil como consecuencia.

Segun Minister di Husticia, su ex-colega Otmar Oduber a bira nervioso y a bay asina leu di cuestiona vocero di Polis y Ministerio Publico riba droga confisca na e Electric Music Festival.

 

Segun Parlamentario Thijsen, e acusacionnan di parti di Minister di Husticia Dowers riba su ex-colega Otmar Oduber ex-Minister di Turismo ta hopi serio y mester ser atende urgentemente y instancianan concerni no por keda keto. No ta cualkier persona a haci e acusacionnan, pero e autoridad mas halto di nos pais riba tereno di husticia ta haci esaki.

E acusacionnan di corumpi hubentud ta bin na momento cu hubentud na nos pais ta pasando problemanan serio di falta di empleo, destabilisacion pa motibo di uzo di droga y alcohol, problemanan social di delicuencia hubenil y embaraso hubenil.

 

Segun Parlamentario Thijsen e acusacionnan di Minister di Husticia ta apunta den direccion cu na nivel mas halto di nos pais tabatin un Ministro liderando problemanan di hubentud.

E Parlamentario ta kere cu tanto instancianan concerni mester actua como tambe e propio ex-Minister Otmar Oduber mester cana su caminda pa busca su derecho y defende su nomber especialmente mirando cu den e siguiente eleccion Otmar ta buscando di gana voto di hubentud. Ta conoci cu pa cualkier cos mas chikito Otmar Oduber ta menasa cu corte y awor Otmar ta worde acusa di cosnan grandi.

Comunidad tambe merece claridad, nos no por laga hubentud bai perdi na man di podernan halto cu actividadnan dudoso cu finalmente ta envenena nos hubentud.

Ademas, fondonan publico no ta di un partido sino di e pais y mester ser uza den cuadra di bon gobernacion, Parlementario Juan E. Thijsen a duna di conoce.

Top