Parlamentario mr. Xiomara Maduro: Carta di CAFT ta indica cu Gabinete Eman lo suta pueblo cu belasting na un manera nunca antes bisto

Poco dia ey, Prome Minister Mike Eman a gaba cu un carta di CAFT, pero no a publica e carta den prensa y tampoco a duna Parlamento un copia pa pueblo por haya sa cu contenido.

Siman pasa diahuebs nos a haya e carta y a compronde pakico Prome Minister Eman tabatin miedo di publica e carta.

E carta di CAFT ta indica cu Gabinete Eman lo suta pueblo cu belasting na un manera nunca antes bisto, segun e experto di MEP, mr. Xiomara Ruiz Maduro.

 

ESFUERSO MAYOR Y NUNCA ANTES BISTO

CAFT den su carta di 8 februari 2017 a indica cu awor cu Gobierno a duna mas informacion, nan ta di opinion cu e norma di 0,5% di deficit lo wordo alcansa cu e Presupuesto di nos pais pa 2017. Pero den e mesun rosea CAFT a indica cu e realisacion di e presupuesto aki ta depende grandemente riba un esfuerso mayor y nunca antes bisto di Departamento di Impuesto.

Cu otro palabra Gabinete Eman lo bay raspa e cartera y suta pueblo cu belasting na un manera nunca antes bisto djis pa por cumpli cu e norma di CAFT.

Anto pesey nos mester puntra nos mes ta con Mike Eman por ta gaba siendo cu t’e pueblo, nan lo manda plat plat cu belasting pa paga?

 

GREENLIGHT PA FIA 438,8 MIYON

E motibo di tanto gabamento y alegria cu e ultimo carta di CAFT aki ta sinta den e hecho cu awor Mike Eman riba lomba di e sufrimento di pueblo a haya greenlight di CAFT pa por refinancia y sigi crea debe pa nos pais.

 

Segun Xiomara Ruiz Maduro, e biaha aki Gabinete Eman por bay fia 438,8 miyon florin pa sera Presupuesto di 2017. T’esaki ta Mike Eman su alegria, ya cu CAFT a yude p’e por yega eleccion na un manera trankilo.

 

PREPARA MAS MEDIDA

Remarcabel ta cu CAFT ta di opinion cu Gobierno lo logra cumpli cu e norma, pero na mesun momento ta conseha Gobierno pa prepara di awor caba medida pa por si acaso no logra haya suficiente placa di belasting.

Si CAFT tabata asina sigur di su opinion, anto no lo tabata necesario pa pidi Gobierno traha riba e medidanan adicional.

E solo hecho cu CAFT ta trece esaki dilanti den su carta, ta muestra cu CAFT a duna su conseho basa riba un ‘drijfzand’ y cu ainda nan ta duda cu locual Gabinete Eman a presenta ta realistico.

 

CAFT TA CREA E PERCEPCION ERONEO CU COS TA BON

Na nos opinion CAFT a wordo introduci na Aruba djis pa crea e percepcion cu nos finanza publico ta bou di control, siendo cu cada bes ta bira mas bisto cu ta cu triki Eman ta purba saca su som, segun mr. Xiomara Ruiz Maduro.

CAFT ta bula pipa dor di bisa cu e ta wak solamente bou di e strepi pa wak si Gobierno a cumpli cu e norma, nan no ta wak riba e strepi kico Gobierno ta haci pa por cumpli cu e norma.

Pero ta riba e strepi e trikinan ta tuma lugar y riba e strepi e dolor di e pueblo ta sinta.

 

Den 2017 pueblo ta bay wordo suta cu belasting na un manera nunca antes bisto djis pa por cumpli cu e norma di CAFT y crea e impresion eroneo cu cos ta bon na nos pais.

Nos mester percura pa den un proximo gobernacion pone un fin n’e farce aki y bay over na un finanza publico realmente sano na unda cu pueblo no mester wordo raspa y suta cu belasting manera e ta aworaki, segun e experto financiero di MEP, mr. Xiomara Ruiz Maduro.

 

Top