Parlamentario mr. Xiomara Maduro: E farce berde na Aruba no ta e sostenibilidad di berdad

“Nos tur kier biba den un pais sostenibel na unda cu nos ta cuida nos naturalesa y nos ta tuma pasonan p’asina nos conserva nos recursonan natural pa nos mes y pa nos yiunan.

Nos Gobierno a hala atencion na Aruba y na mundo cu e tema aki di sostenibilidad.

Pero lamentablemente e bon intencion aki no a concretisa den cuido di nos naturalesa, pero mas bien ta un farce berde bou di cual capa hopi daño ta wordo haci na nos pais. E farce berde na Aruba no ta e sostenibilidad di berdad”, segun Parlamentario mr. Xiomara Maduro.

 

Hipocrecia grandi

“E ta un hipocresia grandi cu na Aruba ta organisa diferente conferencia cu e tema green y ultimo aki hasta un pa propaganda sostenibilidad, siendo cu Aruba su naturalesa ta wordo malamente roza. Mira kico a pasa na Bubali Plas recientemente. Mira e desastre cu a wordo haci cu e naturalesa cu e rozamento di mata y kibramento di mangel pa por traha e Green Corridor.

Wak rond di Aruba con ta rozando den zona destina pa keda berde. Wak nos dump y su peliger cu e ta trece cu ne pa flora, fauna y hende. Nada di esaki ta green y nada di esaki ta yuda pa Aruba por ta sostenibel di berdad”, Parlamentario Maduro ta splica.

 

Hulanda su rol

“Pa por haya e stul den e Comicion di Seguridad di Nacionnan Uni, Hulanda a haci bon uso di Aruba y su Promer Minister Eman su propaganda di sotenibilidad, pero en realidad Hulanda a sera wowo pa tur e desastre cu ta pasando na nos pais rib’e tereno di nos naturalesa.

Pasobra dicon nunca nan a sikiera bisa algo rib’e desastre cu Eman a haci na e dump na Parkietenbos, na unda cu flora, fauna, lama y hende ta wordo severamente afecta?

Dicon nan ta yuda tapa e desastre haci cu e mangelnan na Spaans Lagoon?

Nos a tuma nota tambe cu den e ultimo conferencia riba sostenibilidad organisa na Aruba tabata tin presencia y participacion di oradornan cu ta forma parti di Gobernacion di Hulanda.

Esaki ta otro hipocresia di marca mayor, pasobra nan tambe ta permiti tur e desastre di naturalesa tuma luga na Aruba y nunca a bati alarma pa esaki.

Pero ya caba nos ta mira cu pronto lo pusha tras di cortina pa tuma mas tereno den beslag pa declara como luga berde bou maneho di fundacionnan na unda pueblo no ta bay tin nada mas di bisa. Esey no ta sostenibilidad, esey ta keda un farce berde”, e Parlamentario ta continua bisando.

 

Ban caba cu e farce berde

“E ta remarcabel cu asina mes cu Aruba ta conoce hopi fundacion cu ta tene nan mes ocupa cu nos flora y fauna, poco nos ta tende di nan obhecion pa e desastre cu e Gobierno Berde aki ta haciendo cu e naturalesa na nos pais. Tin ta hasta ta wanta man di Eman y ta dun’e tarima pa por sigi cu e farce berde manipulando e generacion hoben di nos pais cu un ehempel bashi di sostenibilidad. Esaki ta robes, ta haci daño na nos mes y mester bin un cambio.

Mester laga e ego y probecho personal un banda pa por caba cu e FARCE BERDE cu Aruba ta hinca aden. E apelacion ta pa ban traha hunto pa e bienestar real y pa e sostenibilidad di berdad pa Aruba”, Parlamentario mr. Xiomara Maduro a duna di conoce.

Top