Parlamentario mr. Xiomara Maduro: E intergidad di trabou di Controlaria General ta wordo cuestiona

Ya for di 8 di december 2016 MEP a manda pregunta oficial pa Prome Minister Eman y pa Presidente di Parlamento, drs. Mervin Wyatt Ras cu e preocupacion cu nan tin como Parlamentario p’e integridad cu cual e trabounan mester keda desplega na Controlaria General conoci tambe como Algmene Rekenkamer Auba (ARA) di nos pais.

E preocupacion aki a presenta na momento cu ta bira conoci den noticia cu InselAir a keda dos aña sin cumpli cu e leynan fiscal di nos pais.

Como cu e CEO di InselAir ta sinta den e Colegio na cabes di nos Controlaria General, e noticia aki ta trece cune cu e integridad di e trabou di Controlaria General ta wordo cuestiona, segun Parlamenterio di MEP, mr. Xiomara Ruiz Maduro.

 

CEO Y EX INSPECTOR DI BELASTING

Locual ta haci e caso aki mas cuestionabel ta cu e miembro di e Colegio di Controlaria General, banda di ta e CEO di InselAir cu normalmente ta responsabel p’e compania cumpli cu entre otro nos leynan fiscal, tabata tambe un ex Inspector di Belasting pa pais Aruba.

Den e posicion ey y cu e conocemento di obligacion fiscal, ora cu e noticia bira conoci cu e compania bou guia di e CEO aki no ta cumpli cu su obligacionnan fiscal pa mas di 2 aña, e fayo aki ta trece cune un mancha riba e integridad di e organo halto di control di nos pais manera Controlaria General.

Pasobra ki mishi un miembro di e Colegio di Controlaria General mes ta permiti p’e compania bou su mando keda sin cumpli cu e leynan fiscal di nos pais perhudicando nos pueblo?

 

PREGUNTA OFICIAL SIN CONTESTA DI EMAN

E fayo aki ta uno grandi y e ta atacha e confiansa cu pueblo mester por tin den nos Controlaria General. P’e motibo aki MEP a manda pregunta oficial pa Prome Minister Eman encarga cu Asunto General y Presidente di Parlamento, drs. Mervin Wyatt Ras pa atende debidamente cu e fayo aki den un reunion di Comision di Landsuitgaven.

Lamentablemente Prome Minister Eman no a contesta e preguntanan y no a atende tampoco cu e preocupacion aki cu ta pone e trabou di Controlaria General na peliger.

 

Presidente di Parlamento tampoco a yama e reunion pidi y ta parce di ta tolera tambe p’e reputacion di Controlaria General wordo atacha, segun Xiomara Ruiz Maduro

 

LO CORECTO Y LO ETICO

Den un caso asina, lo corecto y lo etico ta p’e miembro di Colegio di Controlaria General tuma su retiro pa no haci mas daño n’e bon reputacion cu Controlaria General mester conta cune den comunidad.

Nos di MEP ta condena e manera cu Prome Minister Eman ta consenti pa hende perhudica e caha di Gobierno pa despues bira impone medida riba pueblo pa yega n’e fondo publico cu falta. E no ta etico ni corecto pa bo perhudica pueblo cu medida djis pa scapa cara di esnan serca di bo cu ta perhudica e intergridad di e trabou di Controlaria General.

 

Top