Parlamentario mr. Xiomara Maduro: E rapport Nos Aruba 2025 a mustra e caminda cu mester cana pa sostenibilidad di Aruba

“Ya for di 2008 diferente stakeholders na Aruba a traha riba un strategia pa asina haci Aruba un pais sostenibel. Na 2010 nan trabou a culmina den e rapport Nos Aruba 2025.

Un rapport amplio cu a conta cu e input y sosten di un grupo grandi di nos comunidad cu participacion di hoben, empresario, medio ambientalista, gremio, sindicato, gobernante etc. cu a formula nan deseo y e caminda pa cana pa yega na un Aruba sostenibel di berdad.

Lamentabel ta cu e rapport Nos Aruba 2025 no a wordo implementa. Na momento cu Gabinete Eman a yega na mando, Mike a djis hink’e den lachi p’asina e por cumpli cu e farce berde cu nos ta mira na Aruba na e momentonan aki”, segun Parlamentario mr. Xiomara Maduro.

 

Nos Aruba 2025, relevante y internacionalmente premia

“Nacionnan Uni a bin cu 17 meta pa logra desaroyo sostenibel mundial y na Aruba un comicion a wordo lanta pa haci un inventarisacion con Aruba ta para y kiko mester wordo haci pa por logra e metanan aki. Pa e tarea aki nos ta convenci cu e informacion compila den e rapport Nos Aruba 2025 cu ta data di 2010, ainda ta relevante pa e tarea aki.

Lamentabel ta cu nos no ta tende Minister Eman of esnan encarga cu e tarea aki menciona e nomber di e rapport Nos Aruba 2025. Con cu bay bin e rapport Nos Aruba 2025 ta algo visionario haci specialmente pa nos pais y cu ademas a gana premio internacional pa e forma con un grupo grandi di nos comunidad a participa pa pone un strategia den otro pa nos sostenibilidad di berdad. Un rapport asina relevante y internacionalmente premia no por a djis wordo hinca den kashi y wordo lubida”, Parlamentario Maduro ta splica.

 

Cambio di farce berde pa sostenibel di berdad

“Nos mester atende cu e tema di sostenibilidad di nos pais na un manera serio. Sostenibilidad no ta ora cu sponsernan di campaña ta haya parkenan solar, of Phillips ta haya e previlegio pa deliver 12 mil luz di LED pa Eman pega rond di Aruba, of un tal Leoncita haya chens pa deliver klinker, piedra y santo pa Green Corridor pa cual naturalesa a wordo malamente roza y destrosa. Esey no ta sostenibilidad, esey ta e farce berde pa acomoda sponsor y sostenedor di partido AVP.

 

Aruba mester un cambio den cual tur nanishi ta dirigi riba e bienestar y sostenibilidad di berdad pa nos pueblo y pais. Nos Aruba 2025 a mustra nos un caminda realistico pa Aruba por bira sostenibel di berdad. Den un proximo gobernacion di MEP nos lo haci debidamente uzo di e informacion di e rapport aki y nos no lo tene berguensa pa mustra mundo e producto, e vision y deseo di nos mesun pueblo pa e sostenibilidad di berdad di nos Aruba stima”, Parlamentario mr. Xiomara Maduro ta conlcui.

Leave a Reply

Top