Parlamentario mr. Xiomara Maduro (MEP): Ban encurasha e stem di e hobennan di nos pais

“Recientemente, un grupo grandi di hoben a bishita Parlamento di Aruba p’asina conoce e organo halto aki di pais Aruba mas di cerca. Pa nos di Fraccion di MEP tabata un placer pa por a duna splicacion rib’e funcionamento di Parlamento y contesta preguntanann di e hobennan di e hala hubenil di MEP HOT y e alumnonan di klas 2 di EPI sector economico cu a bishita Parlamento”, Parlamentario mr. Xiomara Maduro ta conta.

 

“E ta sigur un satisfaccion pa mira cu cada dia e interes di nos hobennan ta bira mas grandi pa locual ta politica na nos pais. Sigur awor cu hopi hoben ta bay vota pa prome biaha, nan tin hopi pregunta rib’e sistema electoral, e trabou Parlamentario y nan kier sa ta ki influencia nan como hoben por tin riba gobernacion di nos pais”, e Parlamentario ta sigui bisa.

 

“Nos di Fraccion di MEP ta contento di por a intercambia cu e grupo grandi aki di hoben y ta encurasha mas hoben pa laga nan stem wordo scucha den politica di nos pais.

Mayoria decicion cu awe ta wordo tuma lo mester wordo carga pa e generacion mas hoben di nos pais y pa e motibo aki e interes y participacion di nos hobennan den politica ta di sumo importancia. Nos ta gradici tur hoben cu a haci pregunta y ta spera di por topa y scucha mas stem di nos hobennan interesa den politica di nos pais”, Parlamentario mr. Xiomara Maduro a conclui.

Leave a Reply

Top