Parlamentario mr. Xiomara Maduro (MEP): Parlamentarionan di AVP mester habri wowo y mente p’e realidad

Nos pais ta den un abismo financiero debi n’e falta di responsabilidad y e maneho descabeya di e Gobierno di AVP. Tur esaki danki n’e Parlamentarionan di AVP cu no a haci nan trabou di controla y keto bay ta ciego p’e realidad.

Ultimo aki mes nos ta wak con Marlon Sneek ta purba bruha tera riba e carta di CAFT sin cu el a sikiera lesa e documento of sin cu el a publica e carta di CAFT pa pueblo mira, segun Xiomara Ruiz Maduro di fraccion di MEP.

 

AVP A BIN CU CAFT

Ta tristo pa mira Marlon Sneek ta insinua atrobe cu ta MEP a bin cu CAFT pa Aruba. Un ridicules ya cu Marlon Sneek mes a chercha di nos raport ‘Feestvierend Ten Ondergaan’ y awe kier bisa cu t’e raport aki a pone presion pa Hulanda pone Eman bou curatela.

Marlon Sneek parce di ta ciego y fo’i tino ya cu e no kier mira y realisa cu ta su propio lider Mike Eman mes a firma Protocol cu Donner, Acuerdo di Diabuebs Santo y a duna ok n’e carta di Geen Bezwaar di Juan David Yrausquin den cual nan a firma y bay di acuerdo pa bay bou supervision financiero di CAFT, Xiomara Maduro a sigui bisa.

Ademas Sneek a lubida caba cu e mes a vota VOOR pa CAFT bira realidad na Aruba.

Ban ta serio, no ta MEP, pero ta AVP a bin cu CAFT pa nan duna e percepcion cu finanza publico ta bou control. Ta ki prueba mas di e realidad Marlon Sneek ta ciega pa wak?

 

PAPIA SIN LESA CARTA

E ta un berguensa pa mira Marlon Sneek purba bruha tera riba e ultimo carta di CAFT siendo cu ningun hende a wak e carta aki pa por confirma cu locual Eman ta papia ta berdad.

Si acaso mes cu Sneek a lesa e carta caba, dicon e tambe tin’e scondi pa pueblo?

Si e informacion di CAFT t’asina bon, dicon tin tanto scondemento asina?

Pa bo sali defende Eman na un manera ciego asina djies papia sin lesa carta, ta un berguensa grandi y gastamento di fondo publico na paga salario di un Parlamentario cu no ta haci su trabou di control, di acuerdo cu Parlamentario Xiomara Ruiz Maduro.

 

HABRI WOWO Y MENTE PA E REALIDAD

Mihor cos cu Sneek y sobra Parlamentarionan di AVP por haci ta habri nan wowo y mente p’e realidad.

Mike Eman a malogra nos pais cu un MegaDebe te pone Aruba bou supervision financiero di CAFT y bou e capa aki a trece nos pueblo den un pobresa creciente.

“Nos ta haci un apelacion na Marlon Sneek y c.s. pa pone un paro n’e weganan infantil aki di bruha tera of busca MEP pa culpa pa erornan di AVP.

Busca manera pa bira serio y pa cumpli cu e trabou di control. Ya caba e pueblo di Aruba a sufri suficiente.

 

Ta momento pa cambia rumbo di nos pais y riba e caminda aki no tin lugar p’e ciegedad di Sneek y e otro Parlamentarionan di AVP cu no kier habri nan wowo y mente p’e realidad”, Xiomara Ruiz Maduro a conclui.

Top