Parlamentario mr. Xiomara Maduro: Minister Dowers ta sconde informacion pa Parlamento di Aruba

Siman pasa porfin Presidente di Parlamento a yama Minister Dowers pa bin duna cuenta na Parlamento di Aruba rib’e criminalidad creciente na nos pais.
Nos fraccion a pidi e reunion aki despues cu e. o. dia 15 di februari 2017 nos por a tende nos Minister di Husticia lansa basta acusacion serio den direccion di su ex colega Minister Oduber. Un acusacion fuerte y grave asina di un Minister di Husticia merece atencion di y splicacion den Parlamento di nos pais.
Lamentabel y cuestionabel ta cu Minister Dowers no kier a contesta ningun pregunta alcaso cu nos a dirigi na su persona basa riba su propio exprecion y acusacionnan haci. Asina e Minister ta comete e eror grandi di sconde informacion pa Parlamento, segun Parlamentario mr. Xiomara Maduro.

Masha hopi droga den concierto
Minister Dowers a declara na e portal di noticia, Noticiacla, cu concierto ta wordo organisa caminda ta bin masha hopi droga na pais Aruba. Literalmente e Minister a declara, ‘nos sa esey y paso nos a para na e fiesta ey y a confisca e droga.’
E mandatario a indica cu ta trata di e concierto Electric y cu Minister Oduber lo a bay reclama vocero di Polis ora e droga a wordo confisca. Basa rib’e exprecion aki y e acusacion den direccion di ex Minister Oduber nos a puntra Minister Dowers pa indica cuanto droga a wordo confisca na e concierto di Electric y tambe pa bisa nos ta ki tipo di droga a wordo haya.

Banda di esaki nos a puntra e mandatario si ex Minister Oduber ta wordo investiga ya cu Minister Dowers mes como Minister di Husticia ta bisa di ta sa di e conciertonan yena cu droga aki y ta imposibel cu nada no ta pasa cu e exprecionnan y acusacionnan aki.
Lamentablemente Minister Dowers a tilda nos di no ta haci pregunta ‘zakelijk’ y a keda sin contesta e preguntanan alcaso haci na su persona, e Parlamentario ta splica.

Narco complacencia
Na momento cu un mandatario sa cu hopi droga ta drenta pa concierto y como Minister di Husticia ta lansa acusacion serio publicamente den direccion di un ex colega Minister insinuando cu e ex mandatario sa di ken e droga ta y p’esey ta purba defende, y e Minister di Husticia no contesta ningun pregunta haci rib’e acusacionnan grave aki, pa nos ta un indicacion fuerte cu e Minister aki ta sconde informacion pa Parlamento.
Esey ta algo hopi grave y de paso ta muestra cu nos pais awor ta conta tambe cu un Minister di Husticia cu lo ta narco complaciente. Pasobra otro lo tabata si nos Minister di Husticia a para duro y contesta tur pregunta haci riba acusacionnan serio cu su mesun persona a lansa contra di su mesun ex colega mandatario di nos pais.
Minister Dowers a faya den manda e señal duro cu na nos pais e Minister di Husticia no ta tolera, ni complace cu narcotrafico, ni ora cu un colega Minister lo ta envolvi, Parlamentario mr. Xiomara Maduro.

Top