Parlamentario mr. Xiomara Maduro: “No laga miedo stroba bo di haci lo corecto, laga bo sonrisa domina bo caminda”

Cu e mensahe: ‘No laga miedo stroba bo di haci lo corecto, laga bo sonrisa domina bo caminda’ nos a observa y celebra Dia Internacional di Hende Muher 2017 den un encuentro masha ameno organisa pa Forza Femenino Grace na Indian Rock Garden riba 8 di maart ultimo.

Un mensahe pa encurasha nos hende muhernan pa no laga miedo domina nan pensamento y stroba nan di logra nan metanan den bida.

 

Un mensahe cu Xiomara Ruiz Maduro mesun persona ta aplica dia aden y dia afor y cu sigur den e aña electoral aki nos tur mester ta conciente di dje.

Cu miedo un hende muher no ta logra educa y supera su mes. Cu miedo nos no por converti nos mes den un profesional y cu miedo Aruba no lo por conoce mas politico femenino.

Sigur e biaha aki den Eleccion 2017 pueblo no mester tin e miedo pa brinda MEP e confiansa pa haci lo corecto di goberna e pais aki na un manera responsabel.

 

Ban haci lo corecto y duna Aruba tambe e oportunidad di conoce e liderasgo di un hende muher como Prome Minister di nos pais. Y den esaki nos no mester tin miedo di deposita nos confiansa den lider di MEP sra. Evelyn Wever-Croes, pasobra Evelyn ta un profesional balente cu ta debidamente prepara pa asumi e encargo importante di trece orden, respet y progreso pa nos dushi Aruba.

 

Mi persona tampoco lo laga miedo stroba nos di haci lo corecto, cu e debido confiansa di pueblo y arma cu un sonrisa riba nos cara, nos lo enfrenta tur reto cu Eleccion 2017 y gobernacion di nos pais ta trece cune.

Como hende muher nos no mester tin miedo di encurasha y sostene otro. Nos mester haci lo corecto pa cumpli cu nos metanan y laga nos sonrisa domina cada reto riba nos caminda.

Un Felis Dia Internacional di Hende Muher 2017 sin miedo!”, segun Xiomara Maduro.

Leave a Reply

Top