Parlamentario mr. Xiomara Maduro: “Nos ta sostene manifestacion pa castigo mas severo Contra Abuso di Mucha”

Ya for di aña 2010 un Comicion special di Parlamento di Aruba a sinta cu diferente instancia di Gobierno riba e problematica di Abuso di Mucha na nos Pais.

Di tur e reunionnan a sali un raport cu algun punto cu mester a keda drecha pa por facilita e trabou di e instancianan envolvi.

Hunto cu esaki tabatin recomendacion tambe p’e parti di programa di concientisacion cu mester tin pa evita e crimen aki contra e inocencia di nos muchanan na nos pais.

 

Pero tempo ta pasa y MEP no ta mira suficiente mehoracion y ultimamente ora a tuma nota di e castigonan cu ta wordo duna n’e malhechornan cu ta comete e atrosidadnan aki contra nos muchanan, esaki ta duna un tristesa profundo, segun Xiomara Maduro di fraccion di MEP.

Di MEP su parti como opocision a traha riba un cambio di ley pa bin cu castigo minimo, pero te dia di awe Gabinete Eman no kier duna su input p’asina e concepto di ley aki por cana su caminda.

 

Di acuerdo cu Parlamentario di MEP, Xiomara Maduro, e Gobierno aki di su banda ta gasta placa den tur cos, menos den locual ta necesario.

Pasobra nos mester tene cuenta cu tin biaha setencianan abou ta concescuencia cu den e parti di investigacion y ora di acomula prueba necesario e cosnan no ta bay optimal pa falta di recurso, sea humano, sea material of simplemente di placa.

Pero aparte di esaki e parti di concientisacion tambe mester keda haya mas atencion.

Locual cu Gobierno ta haci pa concientisacion mester ta mas activo y mester sigi cu e accion di #STOPAWOR di Fundacion Respetami.

 

Banda di esaki nos no mester bagatalisa e importancia di manifestacion pa por crea consciencia serca pueblo di e gravedad di Abuso di Mucha y pakico castigonan mas pisa ta na su lugar.

Pesey diamars ultimo MEP a sostene Fundacion Lisette Gomez den nan manifestacion dilanti Ministerio Publico.

Pasobra como hende, como mama, como Parlamentario y como representante di MEP e ta importante pa nos manda e señal cu Abuso di Mucha ta un crimen cu mester wordo severamente castiga, segun Xiomara Maduro di fraccion di MEP.

 

 

Top