Parlamentario mr. Xiomara Ruiz Maduro: Controlaria General ta victima di mal gobernacion y influencia politico

E problema di InselAir no ta keda solamente na trahador, pasahero y aviacion entre e islanan perhudica. E caso aki tin un rabo masha largo y hasta ta toca Controlaria General di Aruba y hunto cune e gobernacion di nos pais. E motibo ta simpel, segun mr. Xiomara Ruiz Maduro di MEP.

E CEO di InselAir, sr. Nuboer, t’e unico miembro di e Colegio na cabes di Controlaria General di Aruba (ARA) y su envolvimento den e escandalo di InselAir ta rekeri su retiro di e Organo Halto aki di nos pais.

Pero como cu sr. Nuboer no ta tuma honor na su mes y como cu Eman y Presidente di Parlamento tin man riba su cabes, Controlaria General di Aruba ta pasando den un berguensa nunca antes bisto y ta victima di mal gobernacion y influencia politico, di acuerdo cu Xiomara Maduro.

 

Integridad di Nuboer ta cuestionabel

E Colegio di Controlaria General normalmente mester consisti di 3 miembro, pero aworaki ta sr. Nuboer so t’eynan. Pues ya caba ARA no por tuma decicion manera ley ta prescirbi.

Banda di esaki e caso di InselAir cu ta concerni sr. Nuboer como CEO di e compania, ta trece duda den su integridad y hunto cu esaki ta atacha e bon nomber y e inparcialidad di e Organo Halto aki di nos Pais.

A purba scapa cara dor di bisa cu como CEO sr. Nuboer no tabata encarga cu e parti fiscal, pero solamente cu entre otro e parti di mantencion. Pero awor cu investigacion ta mustra cu tin malversacion y fraude pisa cu piesa na InselAir Aruba, nos ta puntra nos mes cu ki cara Eman y Presidente di Parlamento ta bay sigi pone man riba cabes di sr. Nuboer?

E caso di InselAir aki ta uno grave cu ta pone cu mester cuestiona e integridad di sr. Nuboer como e unico miembro di e Colegio di ARA.

 

Eman y Presidente di Parlamento ta complice

Cu awe ARA no por cumpli cu e trabou di control riba Gobierno manera ley ta prescirbi ta debi na e fayo di Eman y di Presidente di Parlamento.

Eman ni e Presidente kier atende cu nos preguntanan oficial y e peticion pa yama un reunion di Commissie Landsuitgaven pa trata e caso serio aki cu ta atacha ARA su funcionamento.

Banda di esaki, e Presidente tampoco tin fin di laga Parlamento dicidi riba ken ta bira e miembronan nobo p’e Colegio di ARA.

 

Como cu fraccion di AVP no a haya nan kier pa nombra solamente hende cu ta afilia na partido AVP den e Colegio, pesey awe ARA su Colegio no ta completo y no ta trahando conforme ley. Un daño grandi ta wordo haci asina na ARA y esaki ta un muestra palpabel di e mal gobernacion di e Gobierno aki y e influencia politico di cual Eman y Presidente di Parlamento ta complice di dje.

 

Mester bin cambio pronto

E daño haci na ARA merece mas atencion. Eman y Presidente di Parlamento a mustra caba cu nan ta apoya fechoria enbes di atende cu nan. Nos pais mester un cambio y den un proximo gobernacion di MEP nos lo percura pa Colegio Halto di nos pais manera Controlaria General Aruba por bolbe recobra nan respet y haya espacio pa haci nan trabou sin influencia politico manera t’e caso awor.

 

 

 

Top