Parlamentario sr. Jeffrey Kelly (AVP) na MEP: “Bagamunderia ta e.o. ora bo ta keda sin presenta na trabou y cobra tur fin di luna”

Parlamentario Jeffrey Kelly di AVP a tuma nota di un articulo di MEP caminda cu ta menciona e palabra “bagamunderia”, refiriendo na e.o. huurmento di edificio. Ta obvio cu cada biaha cu corda partido MEP tocante huurmento di edificio, nan ta bira hopi nervioso y defensivo y ta parce cu nan kier pa pueblo lubida e etapa aki di gobernacion di MEP.

 

Pa cuminsa Parlamentario Kelly ta splica cu e no ta un secreto cu Parlamentarionan di MEP no ta presenta na trabou. Despues nan ta bin cu excusanan fofo, e.o. cu no ta cantidad ta conta sino calidad.

Pero e humilde Arubiano trahador cu ta traha honestamente pa su placa tur dia si no por haci esey, pasobra si e no presenta na trabou sin un motibo valido e ta hay’e den problema cu su dunador di trabou.

Den e caso aki MEP su dunador di trabou ta pueblo di Aruba y na pueblo nan lo mester duna cuenta tardi of tempran.

Pa defini e keda sin presenta na trabou di MEP e palabra mas apropia ta “bagamunderia”.

 

CARACTERISTICANAN DI BAGAMUNDERIA

Loke Gobierno actual ta pagando na huur ta di e.o. e edificionan di MFA y Hospital y esakinan lo bira propiedad di pueblo! No ta manera tempo di MEP caminda cu un miyon florin na huur tabata bay p’e doñonan di edificio di Hotel Central cu tabata wordo uza pa adictonan ambulante (den nos centro di ciudad!).

Y nos tur sa cu e doñonan ta hendenan cu ta famia di Gobierno di MEP. Tambe nos por corda cu mitar Vondellaan tabata na huur cu diferente departamento di Gobierno y ken ta doño di e edificionan ey? Famia di e Gobierno di MEP.

 

E obra maestro di MEP t’esun di un edificio bashi banda di rotonde di Tanki Flip. Den e caso aki Gobierno di MEP a dicidi di traha un contract nobo prome cu e contract di huur a caduca y riba dje a dicidi di saca afo e articulo cu ta duna opcion na un di e partners pa por termina e contrato di huur.

Di e forma aki famia di Gobierno di MEP por a sigui enrikese nan mes riba custia di pueblo. Esaki ta caracteristicanan di un Gobierno di MEP cu tendencianan kleptomano.

Pero si esaki no tabata suficiente nos por a tuma nota di e ultimo obra maestro di MEP. Ora cu un maestra di scol cu tabatin mester di ayudo a pensa cu e lider di MEP lo kier a yud’e y sali na su defensa a bin resulta cu e lider di MEP a manipula henter e situacion.

 

Finalmente e maestra a ricibi un cobransa di 30 mil florin cu e mester a paga den 10 dia.

Concluyendo Parlamentario Jeffrey Kelly ta splica cu pueblo mester tene bon cuenta ora cu MEP haci promesa.

E mesun hendenan cu ta doctora den bagamunderia ta cana grita cu MEP t’e “alternativa”. Pueblo tene cuidou pasobra e cobransa ta bin despues!

Top