Parlamentario sr. Jeffrey Kelly : Papiamento ta di nos y hunto nos mester conserv’e

Nos ta den luna di Cultura y nos por mira cu ya tin diferente preparacion tumando luga pa celebra dia di nos Himno y Bandera en grande. Siman pasa comision di Cultura den Parlamento tabatin e placer di sinta cu representantenan di Fundacion Lanta papiamento pa atende cu esaki y pa delibera tocante e ortografia di Papiamento y e importancia di esaki, Parlamentario sr. Kelly ta splica.

 

Papiamento ta nos lenga y ta sumamente necesario pa nos tur por ta rib’e mesun liña ora ta trata skirbi y papia Papiamento. Nos por a mira tambe e discusion cu a lanta den comunidad na momento cu a uza e palabra “wakiendo” na television y cu despues a surgi un intercambio di opinion y pensamentonan den medionan di comunicacion tocante e uzo di e palabra aki y si e ta Papiamento corecto of no.

 

Na varios ocasion nos ta wordo acerca pa diferente persona den comunidad cu ta puntra nos tocante e ley di ortografia. Nos a compronde cu Directie Wetgeving ta sacando un ultimo version di e ley di ortografia dentro di poco pa Gobierno. Y finalmente esaki lo yega Parlamento pa wordo trata.

 

Scol Multilengual

Actualmente tin dos scol, Colegio Conrado Coronel y Colegio San Hose cu ta scolnan piloto pa loke ta trata e proyecto di Scol Multilengual, caminda cu idioma di instruccion ta Papiamento.

Si bo mira con e muchanan aki ta papia y skirbi Papiamento bo lo keda sorprendi.

 

Desde introduccion di Ciclo Basico na 2006 a introduci Papiamento como vak na scolnan secundario. Pero nos tin cu tene cuenta cu Papiamento ta cuminsa na e raiz di nos comunidad y ta di chikito mester educa nos muchanan con pa skirbi y papia Papiamento corectamente p’asina nos por percura pa nos Papiamento keda existi, e Parlamentario ta mustra.

 

Arte di Palabra

Diasabra cu a pasa Parlamentario Kelly tabatin e honor di ta presente na e competencia di arte di palabra na Cas di cultura. Akinan por a mira con muchanan den diferente categoria a competi declamando poesianan y storianan. Bo ta mira con hobennan cu pa prome biaha ta subi un escenario pa expresa nan mes na Papiamento ta lagabo asombra cu nan talento y na manera di expresa nan mes.

 

Parlamentario Kelly ta manda un palabra di pabien na tur e hoben cu a subi escenario pa competi den e Arte di Palabra. Parlamentario Kelly ta spera cu mirando cu esaki ta luna di Cultura, cu nos tur por para keto un rato riba con bunita nos idioma ta, pero alabes con importante e ta pa skirbi y papia nos idioma corectamente.

Top