Parlamentario sr. Jeffrey Kelly: Studiantenan cu termina nan estudio y regresa Aruba lo ricibi un korting di 35 por ciento riba nan Arubalening

Parlamentario Kelly ta splica cu e ta aplaudi e echo cu Gobierno di Aruba por medio di e lista di Prosperidad Comparti a anuncia cu studiantenan cu termina nan estudio y regresa Aruba den tres aña di tempo lo ricibi un korting di 35 porciento riba nan Arubalening, caminda cu esaki antes tabata 30 porciento.

 

Segun Kelly, esaki lo ta un extra estimulo pa studiantenan cu termina nan estudio den exterior por regresa Aruba p’asina traha den e area cu nan a specialisa nan mes.                             Parlamentario Kelly ta consciente cu varios di nos yiunan di tera cu ta bay studia den exterior ta haya ofertanan atractivo na e pais cu nan a studia na momento cu nan termina nan estudio.         Pa e motibo aki studiantenan tin e tendencia di opta pa keda traha na e pais caminda cu nan a haci nan estudio. Kelly ta di opinion cu mester stimula e grupo di “young professionals” mas hopi posibel pa regresa y aporta na nos comunidad. Aumenta e korting riba Arubalening sigur ta un bon stap pa atrae e grupo aki.

 

Esnan cu a studia den exterior y na Aruba ta consciente di e debe cu bo ta keda cu ne na momento cu finalisa bo estudio. No solamente di e Arubalening sino tambe di Dienst Uitvoering Onderwijs (DUO) cu ta e studielening di Hulanda. Ora cu cuminsa paga e studielening bek esaki sigur ta un peso hopi grandi pa esnan cu a haci e fiansa. Cu e incentiva di un korting di 35 porciento rib’e Arubalening Gobierno di Aruba no solamente ta incentiva e yiunan di tera pa regresa sino tambe ta alivianan pa loke ta trata e debe di Arubalening.

Parlamentario Kelly ta spera cu e decision di Gobierno lo motiva nos hobennan pa sigui studia, profesionalisa nan mes y bin bek pa yuda Aruba bay dilanti.

Top