Parlamentario sra. Lorna C. Jansen-Varlack (AVP): Kiosconan entrega y aki un luna doñonan por disfruta di e kiosconan nobo

E kiosconan dilanti di Welcome Plaza a wordo entrega na Gobierno. E proyecto aki a wordo financia dor di FDA (Fondo Desaroyo Aruba), den e fondo aki tin placa di Aruba y Hulanda.

E proyecto aki a costa 2 miyon florin y el a wordo entrega dor di sr. Anno Postma, lider di e proyecto di Albo Aruba, Parlamentario Varlack ta splica.

 

Pa hopi aña e bendedonan di souvenir a wordo menosprecia y mester a muda di un luga pa otro.

E bendedonan a pasa den situacionnan dificil, nan mester a bende for di kiosconan di palo, sin ventilacion, awa y coriente. E comerciantenan humilde aki ta un grupo grandi cu ta contribui diariamente na nos economia y nan tabata sinti nan mes hopi insigur pa loke ta trata un luga fiho pa bende nan productonan.

 

Ora gobernacion di AVP a bin na mando e grupo aki a muda pa kiosconan temporal cu e promesa cu kiosconan drechi lo wordo traha pa nan den futuro. Kiosconan cu lo ta den bista di e turista. E dia a yega cu e yabi a wordo entrega na Minister Benny Sevinger cu na su turno a duna e yabi na Minister Presidente Mike Eman cu a haci acto di apertura, e Parlamentario ta conta.

 

E kiosconan ta super moderno unda tur e facilidadnan ta in place. Riba e plaza tambe tin un luga unda bishitantenan y otro ciudadano por carga nan telefon of bay riba internet. A tene cuenta cu e aspecto higienico dor di traha bañonan adecua pa e bendedonan y trahadonan. A traha mas of menos 36 kiosco unda 32 di nan lo bay pa e bendedonan.

 

Actualmente esunnan cu ta encarga cu e maneho di e kiosconan ta den combersacion cu e comerciantenan pa nan wordo informa tocante di e reglanan y e contenido di e contractnan.   Esaki ta un otro promesa di Gobierno cu a wordo cumpli.

Esaki ta e vision cu Gobernacion AVP tin pa pais Aruba, un pais di cinco strea. No solamente hotelnan, scolnan, infrastructura di cinco strea, pero tambe kiosconan di cinco strea, Parlamentario Lorna Varlack a duna di conoce.

Top