Parlamentario sra. Lorna C. Jansen-Varlack (AVP): Nos fundeshi cu ta seguridad, playanan y hospitabilidad mester wordo fortica cada instante

E evento anual di Business Mixer di ATA unda diferente stakeholder den turismo a bin hunto den un ambiente hopi ameno a tuma luga .

Miembronan di e comision fiho di Turismo di fraccion di AVP den Parlamento a asisti tambe na e evento aki. Director di ATA sra. Ronella Tjin Ashoe-Croes a hiba palabra e anochi aki unda e enfasis tabata rib’e resultado di cierto investigacionnan di Felicidad (Happiness Index Study) cu a tuma luga e ultimo 5 aña.

 

E resultado di e investigacion aki a indica cu 78% di e populacion Arubano ta feliz y cu 76% ta satisfecho cu nan bida. Fuera di esey tabatin un proceso intensivo di 5 luna pa desaroya “The Destination Development Plan” cu ta carga e nomber “Cu mira pa futuro”.

Den e estudio aki a saca afo e bon y e malo di nos “Tourism Destination Development’. Estudionan tambe a wordo haci bou di nos bishitantenan unda e resultado a sali bon pa Aruba, Parlamentario Varlack ta splica.

 

Banda di e puntonan positivo tambe tabata algun punto negativo cu lo bay rekeri atencion den futuro. Algun di e puntonan cu a wordo señala tabata; bon balor pa placa, e gastonan di biahe y estadia, falta di oportunidadnan pa experiencia cultura local, cuminda local, historia, arte y pa Aruba ta un destinacion pa famia.

Nos tambe por a tuma nota cu e ultimo 3 aña Aruba a bira hopi comercial, tin demasiado hende y cu e sentimento di insiguridad a aumenta. Pa cu e motibonan aki a wordo bisa cu Aruba mester bay bek na e base di nos comunidad cu ta siguridad, playanan bunita y hospitalidad.

Nos ta consciente cu ora e economia di un pais ta stabiel y cu e economia ta crece e tin como consecuencia cu mas hende ta emigra pa e pais y esey ta trece cu ne cu criminalidad ta subi, luganan ta mas yen y lo falta e hospitalidad y e cordialidad di nos hendenan local.                                                                                                         Esaki ta puntonan cu mester haya atencion den tur sector di turismo y den nos comunidad, e Parlamentario ta enfatisa.

 

Den e investigacion bo por mira un convergencia entre e necesidadnan di pueblo di Aruba y e necesidadnan di nos bishitantenan. Den todo caso e ta hopi cla cu nos fundeshi cu ta bay bek na nos siguridad, nos playanan y nos hospitalidad mester wordo fortifica cada instante.                                                                                                                  ATA ta bay bin cu hopi mas ideanan pa sigui stimula y promove nos turismo den futuro dor di ofrece nos bishitantenan tur loke tin riba mercado local y tur loke ta autentico Arubano.

E tabata un anochi di hopi informacion y discusion den un ambiente placentero y nos kier desea ATA hopi exito y sigui hiba Aruba pa dilanti!, Parlamentario Lorna Varlack a expresa na final.

Top