Parlamentario sra. Lorna C. Jansen-Varlack Den preparacion pa Ley di Crèche fraccion di AVP a bishita diferente kinderopvang

Ultimo simannan fraccion di AVP a bishita varios crèche pa haya un bista di e trabounan na un crèche y kico tur e programa ta encera.

E ley di structuracion di nos crèchenan ta na Parlamento di aña pasa y probablemente lo wordo trata e luna aki.

E structuracion ta encera cu cada crèche mester mantene su mes n’e rekisitonan basico pa habri un crèche, mester tene cuenta cu servicio , higiena, siguridad, e desaroyonan personal di cada mucha y un aspecto cu ta hopi importante t’e aspecto di control cu lo tuma luga regularmente den futuro.

 

Cuido di mucha ta un trabou hopi responsabel y e meta ta pa cada mucha haya e cuido mas optimal cu un crèche por brinda riba tur e areanan di desaroyo.

E meta di e bishitanan tabata pa haya feedback di e hendenan cu ta guia un crèche y pa scucha kico ta bayendo bon y kico ta e puntonan di mehoracion.

Fuera di esey nan opinion pa cu varios aspecto den e ley a wordo scucha p.e. e cantidad di mucha pa cada leidster segun nan edad, estudio di kinderopvang leidster etc., segun Lorna C. Jansen-Varlack.

 

E informacion aki ta hopi valioso pa fraccion di AVP pa wak unda mester bin cu cambio of adaptacion den cierto parti di e ley si ta necesario.                                                                                                                                         Nos por a tuma nota cu tin diferencia di prijs na cada crèche, pero basicamente e programa ta cuadra hopi cu otro.

Loke tabata notabel den cada un di crèchenan tabata e pasion, e pasenshi y e dedicacion p’e trabou di cada un di e leidsternan.

Fraccion di AVP kier a gradici e gerente di e crèchenan cu a tuma tempo di nan trabou pa reuni cu fraccion y pa cu e recorido di e crèche.

 

Nos ta spera cu e aprobacion di e Ley di Crèche lo duna e resultado cu tur partner kier cu ta mehoracion di e calidad di cuido en general y lo ta na beneficio di nos muchanan entre 0 y 4 aña.

Cuido y e educacion di e muchanan di e edad aki ta rekeri un bon cooperacion entre e leidster, mayor y otro instancianan y fraccion di AVP ta spera cu e introduccion di e ley aki lo promove esaki, di acuerdo cu sra. Lorna C. Jansen-Varlack.

Top