Parlamentario sra. Lorna C. Jansen-Varlack Inversionnan grandi a wordo haci pa cu renobacion di scolnan rond di Aruba

Durante e ultimo 8 añanan, inversionnan grandi a wordo haci pa cu renobacion di scolnan y hasta tin scolnan cu a wordo basha completamente abou pa cu e situacion deplorabel cu Gobernacion di AVP a haya nan aden.

Durante e prome periodo ex Minister di Enseñansa mr. drs. Arthur Dowers a bishita tur e scolnan rond di Aruba y a haci un analisis profundo di e estado di e scolnan y nan necesidadnan.

Asina a traha un lista di prioridad pa cu renobacion di e scolnan y a cuminsa busca fondonan cu lo por cubri e gastonan, segun e miembro di AVP, sra. Lorna C. Jansen-Varlack.

 

Cu e informacion cu nan a haya e tempo ey a traha un plan di accion y asina a logra renoba varios scol durante e prome periodo di gobernacion.

Minister Michelle Hooyboer a sigui cu e plan di accion y durante e di dos periodo di gobernacion a sigui cu e trabounan di renobacion. Fuera di renobacion di e scolnan a inverti tambe den e upgrading di maestronan pa loke ta toca diferente curso cu a wordo duna.

Cursonan pa yuda guia muchanan cu nan problemanan di comportacion, cursonan di maneho etc.

 

E presupuesto di Enseñansa durante di añanan a wordo aumenta cu miyones di florin. Inversionnan grandi pa drecha scolnan ful rond Aruba.

Awor e lider di MEP sra. Evelyn Wever-Croes ta grita cu e tin un plan pa enseñansa, pero ningun hende ta haya sa kico t’e contenido real di e plan.

Expresa cu bo tin un plan ta facil, pero pueblo kier wak un plan concreto cu metanan a corto plaso y a largo plaso, accionnan, nomber di e scolnan, fondonan etc.

 

Den pasado e mesun lider aki a sclama cu e tin un plan pa frena criminalidad, pero te dia di awe pueblo no a wak un plan.

Plannan di biento pueblo lo bay haya si MEP mester goberna un dia. Hendenan bruha cu ta kere cu pueblo ta kere nan barbaridadnan.                                                                                                                                                    Prome cu eleccion lo tende di diferente partido di oposicion ki plannan nan tin y kico nan lo haci ora nan ta na mando.

Cierto di nan tabatey caba y no a haci mucho cos ora nan tabata Minister di Enseñansa.

 

Otronan ta priminti cu nan lo t’e cambio, pero tur hende sa cu nan t’e politiconan populista.

Pueblo por wak pa nan mes cua ta tur e scolnan cu a wordo renoba ultimo añanan.

E lista ta largo, por menciona algun di nan cu a wordo renoba of cu a haya mantencion grandi p.e. C.G. Abraham de Veer School, Augustinus College, Colegio San Nicolas, John Wesley College, Graf von Zinzendorf Kleuter, Sta. Theresita, John Andrews School, Filomena College basis, Colegio Cristo Rey, esakinan ta algun di e scolnan pariba di brug.

 

Mester bisa cu oposicion di MEP pa 8 aña largo a vota contra presupuesto di pais Aruba, contra di progreso di pais, contra inversionnan pa cu renobacion y mantencion di scolnan.

E pregunta cardinal ta: Kico pueblo por spera di MEP den futuro? E contesta ta cla: NADA, segun e miembro di fraccion di AVP, sra. Lorna C. Jansen-Varlack.

 

 

 

 

Top