Parlamentarionan di MEP tabata e unico politiconan presente pa sostene e manifestacion di Fundacion Lisette Gomes contra e castigonan abou pa abuso sexual di mucha. Evelyn Wever-Croes, Xiomara Ruiz-Maduro, Glenbert Croes, Ady Thijsen y Guilfred Besaril tabata e unico Parlamentarionan presente. “Nos di MEP semper a sostene e causa aki. Nos tin 7 aña den Parlamento ta insisti riba e tema aki. Sinembargo nos tin e minoria y nos so no por logra. E mayoria den Parlamento no kier duna nan cooperacion y pesey te dia di awe no tin ningun adelanto riba e tema aki. Pero den 7 aña ta centenares di mucha mas a wordo abusa sin cu castigonan severo a wordo imponi”, segun Evelyn Wever Croes, lider di MEP. CASTIGO MINIMO “Nos sistema no conoce castigonan minimo, pasobra nan ta limita Huesnan y Ministerio Publico. Castigonan minimo ta wordo considera den casonan extremo, den caso di crisis. Awor nos ta den caso di crisis. Segun Fundacion Lisette Gomes ta dos mucha ta wordo abusa pa siman. E dato aki ta hopi shocking. Pesey nos no por warda mas. Nos no por sigi haci loke nos a haci 7 aña largo y spera un otro resultado. Nos mester haci un cambio drastico. E tata cu abusa di su yiu di 4 aña, di cual Ministerio Publico a haya prueba di “penetracion”, nunca por haya apenas un aña, pasobra ta su prome biaha. Pesey nos kier cambia e castigonan minimo pa den un caso asina e tata haya minimo 10 aña di castigo. Nos lo no descansa te ora nos mira cu algo ta wordo haci pa ataca e abuso aki. Pesey nos ta sostene e accion di Fundacion Lisette Gomes. Ta momento pa nos tur uni, no solamente cu palabra sino sigur cu accion, pa nos protehe nos muchanan” sra. Evelyn Wever-Croes a duna di conoce.

 

SMAC kier a gradici e publico Carnavalesco y tur participante cu a sa di apoya y engrandece varios actividad di Carnaval 63, weekend cu a pasa.

 

JOUVERT MORNING

Diasabra madruga tabata programa pa sali 4’or e Jouvert Morning. Na inicio, SMAC, den presencia di famia y amistadnan, a duna homenahe na sr. Nando Browne.

E Jouvert Morning di e aña aki a ser dedica na feliz memoria di conocido cantante, artista, entertainer, composer Nando “Breakah” “Energyman” Browne, kende a bay sosega.

 

Un gran cantidad di persona a tuma e oportunidad pa recorda Nando Browne por medio di bisti algo di color biña. Por a mira t-shirts di Nando, Massive Brassband a bisti nan biña, hopi hende a verf curpa cu verf biña, of a bisti cualkier acesorio biña.

Jouvert Morning a wordo atendi masalmente y por bisa cu e aña aki a surpasa e cantidad di 10.000 persona.  Un danki grandi na tur banda cu a respalda Jouvert Morning cu nan presentacion.

 

Massive Brassband, STEAM, ‘N Fuzion, Flashback Disco, Le Groove, Mike’s Super Disco, NBO y Tsunami. A reina un ambiente sin igual, y ta ser menciona como un di e mihor actividadnan pa publico te awor.

 

LIGHTING PARADE

Diasabra anochi a toca turno na Aruba su Lighting Parade. No obstante algun obstaculo prome cu parada, a logra sali n’e ora stipula di 8’or.

Un grupo mester a warda pa trailer di nan grupo wordo drecha y asina a logra sali como ultimo grupo den e secuencia y logra bay hunto cu e salida di e parada.

E gruponan den Lighting Parade a bin cu bunita creacion di diferente tema den cada grupo di Carnaval. Tabata tin massa yen di lus y diseñonan hopi bunita di headpieces.

E Lighting Parade a drenta na un ora nechi y por a compronde cu comportacion di e publico nan banda tabata bon tambe.

 

PARADA DI MUCHA SAN NICOLAS

Diadomingo 19 di februari tabata e ultimo parada p’e muchanan.  Despues tambe a programa e Kimamento di Momito den Carnival Village.

A subi caminda poco despues di 2’or cu mas di 1100 participante. Un dia bunita yen di solo y e ambiente unico di San Nicolas cu a sa di saca e  mihor di tur grupo y tur e muchanan riba caminda.

Un parada yen di fantasia y creatividad unda por mira claramente e cantidad di tempo y trabou cu ta hinca den esaki.

 

SMAC ta manda palabranan di pabien na tur group leader y e muchanan en especial cu a briya, nan mester duna nan mes un high-five p’e bon presentacion y pa nan aporte na nos Carnaval.  Despues di e parada uni un masa grandi den Carnival Village p’e evento di Kima Momito. Publico por a disfruta di e banda White Boys Groove hunto cu tur e participantenan infantil y hubenil di Festival di Calypso y Roadmarch 2017 y tambe di Tumberito.

 

Asina a clausura e temporada di Carnaval 63 pa nos muchanan. Un bon noticia cu a drenta via KPA ta cu durante e parada aki no tabatin niun detencion. Pues un danki y pabien grandi n’e publico Carnavalesco.

Esaki lo t’e ultimo siman di Aruba su Carnaval 63.  Riba e schedule ainda tin Parada di Luz diabierna awor y Aruba su Grand Carnaval Parade na San Nicolas y Oranjestad diasabra y diadomingo benidero.  Keda pendiente pa tur informacion relevante riba esaki.

 

 

Top