Parlamentarionan drs. Marisol Lopez Tromp y mr. Andin Bikker kier un reunion urgente di Parlamento

Ayera e miembronan di Parlamento, drs. Marisol Lopez Tromp y mr. Andin Bikker a firma un peticion cu a ser manda pa Presidente di Parlamento, drs. Mervin Wyatt Ras, pa convoca un reunion cu caracter di urgencia pa trata e caso di Minister Paul Croes.

No su investigacion penal, pero p’e novum crea, esta cu Paul Croes, ta keda Minister, pero a haya permiso di parti di Conseho di Minister p’e keda ausente pa un periodo te dia cu e investigacion finalisa.

 

P’e reunion aki, e dos Parlamentarionan aki a pidi pa Prome Minister Mike Eman ta presente, pa splica con a yega na dicho decision, sin cu a consulta Parlamento, como e organo di mas halto di acuerdo cu nos Constitucion.

Tin varios pregunta, p.e. si Paul Croes ta kere cobra su salario, na ki porcentahe, etc. Tin hopi punto cu merece claridad. Asina p.e. su staf, ta pasa tambe pa Minister Angel Bermudez?

 

Manera anuncia, p’e periodo di ausencia di Minister Paul Croes, Minister Angel Bermudez lo haci su trabao di e Ministerio cu Paul Croes ta responsabel p’e

E dos Parlamentarionan, Bikker y Lopez-Tromp a pidi e reunion cu caracter di urgencia y a desea pa haye e siman benidero, cu di acuerdo cu nan averiguacion, Presidente no tin ningun reunion publico pendiente of sigur no tin ningun pa yama.

 

AWEMainta a papia cu Presidente di Parlamento, drs. Mervin Wyatt Ras ayera merdia, y n’e momento ey e no a haya dicho peticion ainda. Lo trata dicho peticion manera tur otro, y tin su proceso pa cumpli cu nan.

 

Un otro miembro, sin a pidi un reunion publico ainda, ta Dangui Oduber, kende a demanda pa Minister Paul Croes retira den 2 x 24 ora. Y e plazo duna, ya a expira, loke kier men e mester pidi un reunion publico pa bin cu mocion di desconfianza.

Top