Parokia di Paradera ta recorda Pastor Tony

En coneccion cu fayecimento di Pastor Antonio (Tony) Peralta, Pastor di Parokia Santa Filomena durante 1988 pa 2002, Comision in Memoriam Pastor Tony R. Peralta di Misa Santa Filomena; ta ofrece diadomingo awor 12 di maart primeramente un Ceremonia Memoriabel na honor di Pastor Tony sigui pa un Santo Sacrificio di Misa.

 

For di 4’or y mei atardi lo tin oportunidad pa firma den e buki di condolencia y pa 4:45 lo duna inicio n’e Ceremonia Memoriabel.

Durante e ceremonia aki algun cooperador di parokia di su tempo lo recorda Pastor Tony su personalidad, carisma, virtud, liderasco y logronan den un manera peculiar cu canto, salmo, poesia y oracion.

 

Nos por corda ainda ora Pastor Tony a yega Paradera; un pastor humilde cu na cuminsamento  tabata haci Misanan cu un Papiamento hopi limita for di Misal cu su predicashinan na Ingles. Durante cu Pastor Tony tabata na Paradera el a lanta un Comision di Catekistanan especialmente pa formacion di muchanan di Parokia, e tabatin hopi atención pa mucha.

Te ainda tur diasabra e muchanan ta reuni pa ricibi formación spiritual.

Pastor Tony tabatin preocupacion y carisma special p’esnan di menos recurso. Hasta di su mes iniciativa a yuda hopi di nan, tambe el a forma Asistencia Social di parokia cu keto bay ta sigui cu su trabounan.

 

Na maneranan particular Pastor Tony a celebra su 20 aña y 25 aña den sarcedocio cu su pueblo di Paradera. Durante e celebracion di 50 aña di Parokia Santa Filomena; Pastor Tony a laga un mensahe: “Ban resa y traha hunto pa nos por scirbi cu pen di oro e futuro di nos parokia, mientras nos ta enfrenta e retonan di e milenio nobo”.

Ta palabranan sigur saca di un vision pa su parokia cu awe ta un estimulo pa un y tur pa sigui padilanti cu fe y curashi pa logra un mihor futuro.

 

Durante e atardi di ceremonia aki un potret di Pastor Tony lo ta exhibi pa publico cu lo duna e imagen bibo di su persona manera cu parokia a conoc’e.

Esaki lo keda un gesto memorabel pa keda recorda Pastor Tony bibo mei-mei di su parokia. Durante firmamento den e buki di condolencia lo tin un box den misa, na disponibilidad di esnan cu ta desea di haci un donacion.

Fondonan ricibi lo wordo manda pa Filipinas como un contribucion di parokia pa duna sosten na e ultimo gastonan di Pastor Tony.

Entiero di Pastor Tony ta tuma lugar dialuna awor (tempo di Filipina) n’e Parokia di Mama Maria di Santo Rosario, Balugo, Oas, probinsya di Albay pa 11’or di mainta.

 

Pa 5or y mei lo inicia cu un Santo Sacrificio di Misa oficia pa Mgr. Greg Redoblado, Vicario general di nos Diocesis, asisti pa Pastor Toti Fuentebella, Pastor di Parokia Santa Filomena y demas pastornan, pa duna gracia na Dios p’e bida y trabounan di Pastor Tony. Miembronan di Koor Santa Filomena lo canta e canticanan di Misa na Latin.

Pastor Toti Fuentebella di Parokia Santa Filomena, den nomber di Comision in Memoriam Pastor Tony R. Peralta; ta invita tur Parokiano, Cooperador, Famia na Aruba, amigo y conocirnan di Pastor Tony, comunidad Filipino na Aruba y tambe muy en particular tur cooperador y Comisionnan di Parokia Santa Filomena, Scol y tur organizacion di Parokia, Parokiano di Santa Theresita y e pueblo di Aruba en general; pa participa n’e ceremonia Memoriabel y e Santo Sacrificio di Misa diadomingo na Misa Santa Filomena na Paradera cuminsando pa 4’or y mei di atardi.

 

Nos ta gradici Cristo-Hesus pa a duna nos Pastor Tony, kende a edifica su Iglesia den nos Parokia pa medio di tur su obranan maraviyoso y nos lo record’e Semper.

Top