Participantenan entusiasmá cu curso na Còrsou pa personanan di confiansa riba tereno di integridad

WILLEMSTAD – Di 28 pa 31 di augùstùs 2017 SRA-Caribbean a cuminsá bou di guia di Nelly Schotborgh y Simone van der Zee cu un curso pa personanan di confianza (vertrouwenspersonen) riba tereno di integridad, special trahá na midí pa Còrsou.

Nuebe participante di diferente servicio gubernamental y semi-gubernamental a sera conocí durante di 4 mainta cu e trabou amplio di un persona di confianza riba tereno di integridad.

Nan a finalisá e promé parti di e curso, esta esun básio, cu bon resultado.

 

E curso ta cumpli cu un necesidad, ya cu na Còrsou mas y mas tin atencion p’e funcion aki, como parti importante di maneho di integridad di organisacionnan. Personanan di confianza riba tereno di integridad ta guia empleadonan pa por traha apertura pa papia tocante di violacion di integridad den nan organisacionnan.

Banda di esey nan ta fungi como persona cu por duna contesta riba preguntanan riba e problemática di integridad.

Nan ta informá y consehá empleadonan y gerencia y nan tin e funcion di señalá comportacion indeseá y otro situacionnan incorecto den e organisacion cu e meta pa prevení esaki.

 

For di 2010 instancianan gubernamental a base di Landsverordening Materieel Ambtenarenrecht (LMA) tin e obligacion di nombra personanan di confianza den nan organisacionnan.

Den sector privá tin un cantidad creciente di persona di confianza. Empresanan (ainda) no tin e obligacion di nombra un persona di confianza, pero sí nan ta obligá di ta un bon dunador di trabou.

Mester mira nombramento di persona di confianza den e lus ey. Di ámbtenaar, pero tambe di empleado den empresa ta verwacht cu nan ta informa actonan incorecto na mando di e organisacion.

Ser un bon ámbtenaar y un bon empleado ta trece cuné un actitud activo den prevení y señalá actonan incorecto den un organisacion.

 

Considerando cu no ta tur hende ta bay mésun fácilmente serca mando, sigur nò ora cu esun cu ta cometé e acto mes ta un ehecutivo, a introducí e funcion di persona di confianza. Empleadonan tin e oportunidad di mèldo actonan incorecto den forma anónimo serca e persona di confianza. Personanan di confianza tin obligacion di mantené secrecia, y solamente den casonan di seriedad excepcional ta permití pa keda sin cumpli cu e obligacion aki.

 

E funcion di un persona di confianza riba tereno di integridad hopi bes ta un tarea cu empleadonan mester cumpli cuné banda di nan tarea regular, aunke ta posibel tambe pa haci uso di un persona di confianza externo.

Ta un funcion compleho cu ta cubri hopi área, cu ta rekerí hopi competencia y conocimento.

P’e motibo aki SRA-Caribbean como parti di su servicio riba tereno di integridad ta brinda un  curso pa Còrsou prepará personanan di confianza bon riba nan tarea.

 

E curso ta adecuá tambe pa miembronan di gerencia, empleadonan di Departamento di Recurso Humano y otronan cu den nan trabou di tur dia tin di haber cu asuntonan cu ta regardá e problemática di integridad.

 

Tópiconan riba agènda di e curso ta: Maneho di integridad y e tarea di e persona di confianza, sosten (opvang) y guia di empleadonan cu informa violacion di integridad, con pa atendé cu e loke mèldo y dunamento di informacion y conseho.

Tambe ta entrená hopi cu casonan den práctica. Durante di e entrenamentu ta usa un actor, di moda cu e participantenan por entrená den nan propio idioma.

Mirando e éxito di e curso, SRA-Caribbean tin e intencion pa cuminsá un curso nobo e aña aki. tambe a tuma e iniciativa pa lanta un Asociacion di Personanan di Confianza den e parti Caribense di Reino.

Pa mas informacion por consultá www.sra-caribbean.com. Personanan di contacto ta Nelly Schotborgh (524-7521) en Simone van der Zee (677-0730), kende ta alcansabel tambe via di info@sra-caribbean.com.

 

Leave a Reply

Top