Partido MAN kier sa Gobierno interino realmente ta di pueblo?

WILLEMSTAD – Siman pasa Gobièrno interino, sostené pa 12 miembro di Parlamento a sinta. Dos di e miembronan aki hunto tin un cantidad hopi tiki na voto.

Votonan cu nan a haña momento cu nan tabata forma parti di partidonan cu na òctober 2016 a haña suficiente sosten di pueblo pa forma un Gobierno.

Esaki ta un Gobièrno pa òf di pueblo?

Den un estado di derecho ta existí un trías política y un balance entre “uitvoerende machten” y “controlerende machten”, esta entre Gobièrno y Parlamento di Còrsou.

 

Parlamento tin e posibilidad pa manda un Gobièrno cas, si nan ta di opinion cu e no ta haciendo su trabou bon.

Si un mayoria den Parlamento manda un Gobièrno cas, e Gobièrno tin cu entregá su retiro na señora Gobernador, manera a sosodé tambe dor di Gabinete Koeiman.

E Gobièrno cu a keda mandá cas, pa ley por disolvé Parlamento y yama eleccion nobo. Cu otro palabra e Gabinete por pidi e pueblo votador expresá su mes den un eleccion liber y democratico si e ta haña cu e hecho cu e Gobièrno a keda mandá cas ta hustificá òf no.

 

T’e pueblo votador tin e derecho máximo pa dicidí si e partidonan cu hunto ta forma e Gobièrno a haci un bon trabou si òf no. E balance entre Gobièrno y Parlamento ta percurá pa un stabilidad di gobernacion y t’e votador t’e unico cu por dicidí ken e kier pa representé.

Miembronan di Parlamento cu bay cu asiento di nan partido, lo no por manda un Gobièrno formá pa partidonan cu a gana eleccion cas sin mas y asina stroba continuidad di gobernacion.

 

No ta un miembro di Parlamento ta dicidí riba su mes si e tin sosten di pueblo si òf no, esey ta pueblo ta dicidí.

Asina e ta den un Estado di Derecho caminda ningun hende ni tampoco miembronan di Parlamento y Ministernan ta riba òf por trapa nos leynan democrático.

Cualkier intento pa para eleccion ta keda considerá cu kier sera boca di pueblo. Kier haci pueblo “monddood” manera nan ta bisa na Hulandes.

 

Cualkier intento pa para eleccion dor di miembronan di Parlamento ta mina derecho di e votador. Caminda t’e miembro di Parlamento mester duna cuenta y razon n’e pueblo votadór. Asina simple e cos ta y asina e ta funcioná den un Estado di Derecho.

A caso e mayoria den Parlamento no kier pa pueblo papia pa medio di un eleccion? P’esey kier para eleccion y asina mina e derecho fundamental aki di e votadór?

 

Ta miedo e mayoria den Parlamento, sostené pa miembronan cu a bula waya tin, cu pueblo lo vota masalmente y scoge un otro mayoria?

T’e mayoria ey ta dicidí pa pueblo? Esaki ta un locura. Esaki ta loke nos kier den nos Pais Còrsou?

E mayoria mester goberná den un democracia. E mayoria tin cu vota pa proposicionnan como mandato di pueblo.

E mayoria den Parlamento no ta pará riba nos leynan ni tampoco e ta doño di e pueblo votador.

Al contrario, e pueblo votadó ta dicidí ken e kier pa representé den Parlamento. Esaki ta sosodé pa medio di un eleccion liber y democrático cu mester tuma lugar cada 4 aña y segun nos leynan democrático.

E coalicion actual ta grita cu nan tin un “Gobièrno pa y di Pueblo” pero realmente e ta asina?

Si un Gobièrno pa y di Pueblo ta trapa e derecho di e votadór, e ta na bienestar di e pueblo òf contra di e pueblo?

 

Nos di partido MAN ta para pa democracia y nos no tin miedo pa laga pueblo dicidí mediante un eleccion. Nos mester salbaguardiá y defendé nos democracia.

Top