Partido MEP a celebra Dia Internacional di Hende Muher den gran forma

Dia 8 di maart, Dia Internacional di Hende Muher, partido MEP a celebra na grandi den Indian Rock Garden. E evento, organisa pa Forsa Femenino Grace, tabata sold out di tempran.

Durante e anochi sumamente ameno por a scucha discursonan hopi inspirativo y poesia, tabata tin reconocemento n’esnan cu a aporta na partido MEP y Forsa Femenino Grace durante 46 aña di existencia di partido, y na final tabatin un entretenimento hopi anima dor di sr. Etty Toppenberg.

 

Sra. Ella Tromp-Yarzagaray tabata orador invita, y a comparti cu tur esnan presente e desaroyo di derecho di hende muher durante tempo.

Tambe el’a para keto n’e logronan di hende muher durante historia. Por a nota cu tur hende a keda masha contento cu e discurso di sra. Ella Tromp-Yarzagaray, pasobra ta nos mesun hendenan.

Hopi biaha, ora bo busca hende di exterior pa papia, e por ta interesante, pero nos mesun hendenan ta haci’e mucho mas mihor.

Na final di su discurso sra. Ella Trom-Yarzagaray a ricibi un homenage pa su añanan di dedicacion na partido MEP, y na Forsa Femenino Grace.

 

Ademas, di e discurso di sra. Ella Tromp-Yarzagaray, sra. Yuyu Croes, Presidente di Forsa Femenino Grace, a gradici tur presente especialmente pa haci e anochi un exito un biaha mas. Sra. Clarette Quandus a declama un bunita poesia, dedica n’e hende muher.

Sra. Xiomara Ruiz-Maduro a hiba un discurso riba e tema: “No permiti miedo strobabo di haci lo corecto”, den cual el’a relata tambe riba experiencianan personal.

 

Finalmente sra. Evelyn Wever-Croes a hiba un discurso riba e tema internacional p’e fecha aki “Be bold for change”, “Ban p’e cambio. Sin miedo!”.

E tema internacional ta casualmente e mesun lema cu partido MEP ta hibando den comunidad. Ban p’e cambio, sin miedo, y den esaki sra. Evelyn Wever-Croes a relata kico t’e cambionan cu den su vision nos mester na Aruba, pa nos haci Aruba manera e tabata, pa nos haci nos hendenan orguyoso atrobe di nos dushi Aruba.

 

Un parti di e anochi a wordo dedica pa rindi homenage na damanan cu durante añanan a contribui na Forsa Femenino Grace y na partido MEP. Por a nota cu esnan cu a ricibi e homenahe a keda sumamente contento y agradecido.

E anochi a wordo clausura pa un tremendo animacion di sr. Etty Toppenberg, kende a pone tur hende riba pia pa canta y baila.

Un anochi bunita cu lo ta dificil pa lubida. Pabien Forsa Femenino Grace y pabien partido MEP.

Top