Partido MEP a honra sra. Ella Tromp-Yarazagaray

 

Partido MEP, bou liderasgo di sra. Evelyn Wever-Croes a cuminsa rindi homenage na baluarte y hendenan cu a duna un aporte grandi na partido MEP y na Aruba. Mientrastanto aproximandamente 500 persona a ricibi homenage, y e lista pa personanan pa duna homenage ta largo ainda.

 

Riba Dia Internacional di Hende Muher, lider di partido MEP Evelyn Wever-Croes a rindi un homenage especial na sra. Ella Tromp Yarzagaray. Y a toca na sra. Mireille Sintjago pa conta algo di sra. Ella Tromp-Yarzagaray.

Ella ta casa cu sr. Leo Tromp. Nan tin 3 yiu, y 2 nieta. Ella a cuminsa traha den Gobierno, na Departamento di Labor y Turismo, y despues a bay traha na oficina di accounting y mas despues den enseñansa.

 

Ella a drenta política riba lista di MEP na aña 1989, y a keda den política te na 2005. Na eleccion di 2005 Ella no a participa mas.

Durante su carera político Ella a ricibi varios condecoracion. Condecoracion di Ridder in de Orde van Oranje Nassau na 1994 y condecoracion Fransisco de Miranda di Venezuela na 1992.

 

Tambe Ella a ocupa varios funcion: Minister Plenipotenciario pa Aruba na Hulanda 1991-1993. Minister di Finanza 1993-1994. E ta conoci como un dama cu a maneha finanza cu man duro y a logra e prome surplus den finanza di país Aruba.

Miembro di Parlamento 1994-2001; Minister Plenipotenciario na Hulanda 2001-2005, na unda el a keda cu hopi bon contacto cu miembronan di Gobierno y Parlamento Hulandes, demostrando cu nan mester respeta Aruba.

 

Na aña 2005 Ella Tromp-Yarzagaray a sali for di politica activo. Y finalmente como coronacion di su carera ya caba impresionante, Ella a ocupa e posicion di Gobernador Interino di país Aruba desde 2008, pa un periodo di 6 aña inicialmente, te cu 2014. Pero e periodo a wordo prolonga te 2016, pues 8 aña.

 

Ella Tromp-Yarzagaray tin un trayectoria sumamente impresionante. Ella ta un hende di tur hende, cu un fe grandi den Dios. Un mama, un wela, un gran dama, cu ta un inspiracion pa hopi den política y, di cual henter e famia di Forsa Femenino Grace y MEP ta sumamente orguyoso.

Como muestra di gratitud a presenta sra. Ella Tromp-Yarzagaray un reconocemento. Mester bisa cu Ella a keda masha contento cu e reconocemento.

 

 

Top