Partido MEP a reuni cu Departamento di Asunto Social: Pone e ser humano central ta MEP su prioridad

Lider di partido MEP Evelyna Wever-Croes a encabesa un delegacion grandi di politico di MEP kendenan a reuni cu Departamento di Asunto Social.

Di parti di MEP a participa n’e reunion Setty Christiaans-Yarzagaray, Darlaine Guedez-Erasmus, Hendrik Tevreden, Daphne Lejuez, Roderich Lopez, Amy Richards, Eddy Paris, Sharlene Starke, Stephanie Croes, Jerehm Campbell, Endy Croes y Evelyna Wever-Croes.

 

Durante e reunion e politiconan a haya un presentacion di e situacion social na Aruba. P’e politiconan di MEP e situacion ta hopi alarmante y ta teme pa un explosion social.

Tur esaki ya e partido politico a acentua varios biaha cu ta pasa, pasobra Gobierno actual a prefera di inverti den klinker, enbes di den e problemanan social. Mester evita cu e “bom” social aki rementa.

 

E expertonan di Departamento di Asunto Social a delinia e maneho pa atende cu e problemanan social riba termino corto y termino largo. Tambe a enfatisa e importancia di e nucleo familiar den e proceso aki.

Di parti di partido MEP, lider di MEP Evelyna Wever-Croes a expresa su gratitud p’e presentacion: “Pa nos di MEP prioridad ta pa pone e ser humano central atrobe y pesey ta importante pa reuni y scucha di e departamento cu ta atende cu e ser humano cu mester di asistencia pa haya sa con por yuda pa cada ser humano tin un mihor calidad di bida.

Mi ta impresiona p’e plan di e Departamento di Asunto Social, y di nos parti nos ta determina pa duna nan e sosten cu mester pa por logra atende cu problemanan social na Aruba”.

 

Leave a Reply

Top