Partido MEP ta reacciona riba Parlamentario Melvin Tromp – “Te ainda Melvin Tromp no ta realisa den ki desaster financiero su partido AVP a hinca nos pais aden”

Despues di 8 aña di Gabinete Eman, te ainda e ex-parlamentario Melvin Tromp, debi na su falta di conocemento financiero, no ta consciente den ki desgracia financiero, economico, social y di criminalidad su partido a hinca nos pais aden.

Den un comunicado di e siman aki, sr. Tromp a bolbe bin cu su acostumbrado mentiranan caminda e ta declara cu “e gobierno di MEP lo biaha pronto pa Hulanda pa busca placa pa atende e desaster financiero cu gobierno di AVP a laga atras”. (Mea culpa!).

 

Hecho ta cu MEP ta contento cu sr. Tromp porfin a reconoce cu su gobierno di AVP a laga un desaster financiero atras, pero ta condena e mentira di cu e gobierno nobo lo biaha pronto pa Hulanda pa busca placa fia. Esaki siguramente no ta e caso y tipo di mentira asina por a sali solamente for di un mente diferente manera di sr. Tromp. Siguramente e gobierno nobo lo no bay Hulanda pa busca placa fia, pero lo bay trece na conocemento di Hulanda e situacion financiero desastroso laga atras pa Gabinete Eman y e intencion serio di e gobierno nobo pa soluciona e problema aki. E solucion ta basa riba un plan concreto y bon defini con ta sali for di e situacion aki, e.o. por medio di un refinanciamento di e interes riba e megadebe y di cual Hulanda ta co-responsabel di e debe gigantesco aki. Hecho ta cu e gastonan di interes a aumenta for di 116 miyon florin na 2009 te cu 215 miyon florin na 2017. Pues den 8 aña di Gabinete Eman e gastonan di interes so a aumenta cu 100 miyon florin!

 

Sr. Tromp kier pa pueblo lubida con e megadebe aki a ser crea, esta por medio di tur e deficitnan durante e ultimo 8 añanan, caminda a registra recordnan di deficit nunca visto manera na 2011: 325 miyon, 2012: 443 miyon, 2013: 333 miyon, 2014: 406 miyon florin. Y tabata hustamente na 2014 cu Hulanda a bisa “Ta Basta” cu e derochamento aki y a claba e gobierno di AVP un KB y pa despues impone e supervision di CAFT riba e mesun gobierno aki. Pero asina mes cu nos pais ta bao supervision di CAFT, Gabinete Eman a bolbe cu su hazaña desastroso riba tereno financiero, ora cu nan no ta cumpliendo cu e normanan cu nan mes a stipula pa nan mes, ya cu nan no ta logrando pa baha e deficit di aña 2017 te na -25 miyon florin y ni tampoco crea un surplus di +25 miyon florin na 2018, sino cu e presupuesto di 2018 ta mustra cu lo bay tin otro deficit astronomico di -195 miyon florin! Y ta hustamente debi na e deficit di -195 miyon aki e gobierno nobo tin cu bay Hulanda pa busca un solucion factibel pa cu e desaster financiero cu ta persiguiendo nos pais desde 2010 en adelante y tur esaki pasobra nos tabata tin un parlamentario sin wes’i lomba manera sr. Tromp cu no a para firme pa un finansa publico sano, controla su gobierno y asina evita cu nos pais ta hinca awe den e derumbe financiero.

 

Tambe sr. Tromp den su comunicado a trece padilanti cu “na 2009 AVP a haya e pais aki den un desaster completo y asina mes mey mey di e desaster aki, Gabinete Eman a percura pa duna esunnan den mas necesidad, yudansa den forma di entre otro reparatietoeslag, financia gasto di scol pa miles di mucha sin cu mester a bay Hulanda pa busca placa”. Sinembargo den e mesun rosea sr. Tromp no ta conta pueblo con tur esakinan a ser paga, ya cu na final di 2009 gobierno di AVP a haya 970 miyon florin for di Gabinete Oduber, e.o. Placa di Plant N.V., BBO di Valero, BBO local, FDA, Ganashi di Banco Central. Si no tabata pa e 970 miyon aki cu nan a hereda, Gabinete Eman lo no por a emplea tambe mas di 400 coordinador cu partijdiploma, un cantidad espantoso di contractantnan y consultantnan y siguramente lo no tabatin placa pa e gobierno derocha na  Wubbo Ockels, Richard Branson, Al Gore y tur e locuranan di conferencianan green. Cu AVP a haya e caha di gobierno bashi mes nan a derocha sin misericordia, corda si nan a haya e caha yen di placa mes! Hecho ta cu awe na 2017 e gobierno nobo lo bay haya un caha completamente bashi y riba dje cu pata pata di debe pa sigui paga. Anto ainda sr. Tromp no kier pa e gobierno nobo bay Hulanda pa busca solucion pa e desaster financiero cu su partido AVP a ocasiona. Melvin Tromp, een toontje lager, alstublieft!

Leave a Reply

Top